काठमाडौं : कोरोना भाइरस (कोभिड–१९) संक्रमणका बीच भिजिट भिसामा आफ्नो मुलुक प्रवेश गरी अलपत्र पर्ने विदेशीहरुको संख्या बढ्दै गएपछि संयुक्त अरब ईमिरेट्स (यूएई)ले प्रवेशमा कडाई गर्न शुरु गरेको छ । विदेशी पर्यटकका लागि खुला रहेको यूएईमा नेपालसँगै दक्षिण एशियाका युवाहरु मानव तस्करहरुको प्रलोभनमा परी भिजिट भिसामा अलपत्र पर्ने गरेका छन् ।
भिजिट भिसामा गई स्वतन्त्रपूर्वक कम्पनी परिवर्तन गर्दै आकर्षक तलवमा काम गर्न पाइने भन्दै दलालहरुले म्यानपावर कम्पनीबाट जाँदा समय लाग्ने र कोरोना संक्रमणका कारण कम्पनीले भिसा पठाउन पनि ढिला गर्ने भन्दै भड्काएर प्रलोभनमा पार्ने गरेका छन् ।
भिजिट भिसामा जानेहरुले भने यूएई पुगेपछि काठमाडौंमा भनेजस्तो आकर्षक तलव र राम्रो काम पाउन सक्दैनन् । भिजिट भिसाको तीन महिने अवधि सकिएपछि उनीहरु ओभरस्टे भएर समस्यामा पर्ने गरेका छन् । यूएईमा अलपत्र पर्नेमा अधिकांश भिजिट भिसामा जाने युवाहरु रहेको त्यहाँस्थित नेपाली संघ संस्थाहरुले बताउने गरेका छन् ।
केही समययता ठूलो संख्याका विदेशी नागरिक यूएईका विभिन्न विमानस्थलहरुमा अलपत्र परेपछि कडाई शुरु गरिएको बताइएको छ । पाकिस्तान र भारतबाट गएका हजारौं व्यक्ति कोभिड परीक्षण सम्बन्धी कागजात नभएपछि यूएईले त्यस्ता यात्रु बोक्ने जहाज कम्पनीलाई जिम्मेवार ठहर्याउँदै यूएई पुगेका यात्रुहरुलाई सोही विमान वा सोही कम्पनीको अर्को विमानमा स्वदेश फर्काउने गरिएको स्थानीय सञ्चारमाध्यमहरुले उल्लेख गरेका छन् ।
यसअघि भिजिट भिसामा यूएई जाने विदेशी पर्यटकहरुसँग कम्तीमा एक हजार दिराम साथमा हुनुपर्ने प्रावधान रहेकोमा त्यसलाई परिवर्तन गरी दोब्बर अर्थात कम्तीमा २ हजार दिराम हुनुपर्ने नियम बनाइएको बताइएको छ । पहिलेजस्तै दुईतर्फी हवाई टिकट अनिवार्य गरिएको छ ।
वैदेशिक रोजगारीको नाममा भिजिट भिसामा यूएई पठाएर ठगी गर्ने क्रम कोरोना संक्रमणको बीचमा ब्यापक बनेको तथ्य यसअघि मध्यान्ह राष्ट्रिय दैनिकले खुलासा गरेको थियो । संस्थागतरुपमा कामदार पठाउने नेपालका म्यानपावर कम्पनीहरुले आफुले कामदार पठाउँदै आएका कम्पनीहरुमा गरेको सम्पर्कका आधारमा भिजिट भिसा प्रयोग गरी धेरै युवा युवतीहरु यूएई पुगेको रहस्य खुलेको थियो ।
नेपालबाट हुने मानव तस्करी रोक्न भिजिट भिसामा विदेश जाने यात्रुहरुमाथि सोधखोज र अनुगमन गर्न त्रिभुवन अन्तर्राष्ट्रिय विमानस्थलस्थित अध्यागमनका कर्मचारीललाई विशेष जिम्मेवारी दिइएको छ । तर त्यहाँ खटिएका कर्मचारीले अनुगमन र नियन्त्रणको बदला विगतदेखि नै मानव तस्करीको धन्दा गर्ने गिरोहसँग मिलेर भिजिट भिसामा पठाउने गरेको बताइएको छ । स्रोतका अनुसार भिजिट भिसाको धन्दामा राजधानीका केही ट्राभल एजेन्सी र एयरलाइन्स पनि संलग्न रहेका छन् ।
नेपालबाट भिजिट भिसामा यूएई जाँदा कम्तीमा ४ लाख रुपैयाँसम्म असुल्ने गरिएको पीडितहरुको भनाइ छ । भिजिट भिसामा जाने व्यक्तिले लैजाने एक हजार डलर यूएई पुगेपछि तत्कालै दलालले कब्जा गर्ने गरेका छन् । काठमाडौंबाट लगेका युवायुवतीलाई कतिपय दलालले फ्ल्याटमा राखेर चर्को भाडासमेत असुलेर कमाउने गरेको यूएईबाट फर्किएका नेपालीहरुले बताउने गरेका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies