भर्जिनिया, ९ नोभेम्बर । नेपाली नर्स ममता काफ्लेको हत्या अभियोगमा अमेरिकाको भर्जिनियामा चलिरहेको मुद्दाको १८औँ दिन सोमबार नरेश भट्ट फेरि अदालतमा साक्षीका रूपमा उपस्थित भए । उनले ममताप्रति आफूले गरेको व्यवहारप्रति पछुतो रहेको बताए । प्रतिरक्षा पक्षले उनको मानसिक अवस्थाबारे एक क्लिनिकल मनोवैज्ञानिकलाई पनि साक्षीका रूपमा प्रस्तुत गरेको छ ।
अमेरिकी सञ्चारमाध्यम डब्ल्यूजेएलए (७News) का अनुसार सोमबार बिहानको सुनुवाइमा भट्टले ममतासँगको सम्बन्ध र आफ्नो विगतको कामबारे बयान दिएका थिए । उनले ममताप्रति आफूले राम्रो व्यवहार नगरेको र उनलाई आवश्यक सहयोग गर्न नसकेको स्वीकार गरे ।
भट्टले ममताको मृत्युमा आफ्नो व्यवहार पनि एउटा कारण हुन सक्ने बताएका छन् । तर उनले ममताको मृत्यु आत्महत्याका कारण भएको आफ्नो दाबी दोहोर्याए । ममतामाथि आफूले शारीरिक दुर्व्यवहार नगरेको र उनका तस्बिरमा देखिएका चोटपटक आफूले नपुर्याएको पनि उनले जिकिर गरे ।
यसअघि अभियोजन पक्षले अदालतमा ममताका चोटपटक देखिने तस्बिर र भिडियो प्रस्तुत गरेको थियो । सोमबार भट्टले ती चोटपटक लागेको समय आफूलाई स्पष्ट सम्झना नभएको बताए । आफूले उनलाई अस्पताल लैजाने प्रस्ताव गरेको पनि उनको भनाइ थियो ।
भट्टमा पीटीएसडीका लक्षण रहेको मनोवैज्ञानिकको बयान
सोमबारको सुनुवाइमा प्रतिरक्षा पक्षले फोर्डह्याम विश्वविद्यालयका मनोविज्ञान प्राध्यापक तथा क्लिनिकल मनोवैज्ञानिक ब्यारी रोजेनफेल्डलाई साक्षीका रूपमा प्रस्तुत गरेको थियो ।
रोजेनफेल्डले भट्टमा पोस्ट ट्रमाटिक स्ट्रेस डिसअर्डर (पीटीएसडी) का मापदण्डअनुसारका लक्षण रहेको अदालतमा बताएका छन् । उनले दुई दिनमा करिब आठ घण्टा भट्टसँग बिताएर मनोवैज्ञानिक परीक्षण गरेको जानकारी दिएका थिए ।
रोजेनफेल्डका अनुसार भट्टले नेपालमा रहँदा भोगेका केही कठिन र आघातपूर्ण अनुभव सुनाएका थिए । माओवादी विद्रोहीको नियन्त्रणमा रहेका बेला यौन दुर्व्यवहार भोगेको उनको दाबी पनि भट्टले सुनाएको मनोवैज्ञानिकले बताए ।
भट्टले लामो समयदेखि दुःस्वप्न आउने, विगतका घटनाले सताउने र अपराधबोध हुनेजस्ता समस्या बताएको रोजेनफेल्डको भनाइ थियो । परीक्षणले भट्टले आफ्ना लक्षण बढाइचढाइ गरेको संकेत नदेखाएको पनि उनले बताए ।
तर, मनोवैज्ञानिक परीक्षणले ममताको मृत्युबारे भट्टले दिएको बयान सत्य हो वा होइन भन्ने पुष्टि गर्न नसक्ने उनले स्पष्ट पारे ।
भट्टले सुनाएको घटनाक्रमका आधारमा ममतालाई अचेत अवस्थामा भेटेपछि उनी आत्तिएको र त्यसपछि लगातार गलत निर्णय गरेको रोजेनफेल्डले अदालतमा बताएका थिए ।
अफगान शरणार्थीसम्बन्धी कामले मानसिक स्वास्थ्यमा असर
सोमबार बिहानको बयानमा भट्टले अमेरिकी सेनाका सहयोगी अफगान नागरिकलाई अमेरिकामा पुनर्स्थापना गर्ने काममा आफू संलग्न रहेको बताएका थिए । अपरेसन फ्रिडम्स सेन्टिनेलअन्तर्गत गरेको उक्त कामलाई उनले आफ्नो जीवनको महत्त्वपूर्ण काममध्ये एक भनेका थिए ।
प्रतिरक्षा पक्षका वकिलले अफगान शरणार्थीलाई सहयोग गर्ने काम कठिन थियो कि थिएन भनेर सोध्दा उनले कठिन भएको बताएका थिए । उक्त कामले आफ्नो मानसिक स्वास्थ्यमा नकारात्मक असर पारेको पनि उनले स्वीकार गरे ।
अदालतमा भट्टले नेपालमा बाल्यकाल बिताएको घरको भिडियोसमेत देखाइएको थियो ।
मुद्दा निर्णायक चरणमा
ममताको हत्या गरेको अभियोग लागेका भट्टले यसअघि अदालतमा ममताको शव लुकाएको र त्यसलाई टुक्र्याएर फालेको स्वीकार गरेका थिए । तर हत्या गरेको आरोप अस्वीकार गर्दै ममताले आत्महत्या गरेको दाबी गरेका छन् । ममताको शव अहिलेसम्म फेला परेको छैन ।
अभियोजन पक्षले यसअघि ८० भन्दा बढी साक्षी प्रस्तुत गरेर आफ्नो पक्षको प्रमाण पेस गरिसकेको छ । प्रतिरक्षा पक्षले भट्टलाई साक्षीका रूपमा प्रस्तुत गरेपछि अहिले उनको बयान र मानसिक अवस्थासम्बन्धी प्रमाणमा सुनुवाइ केन्द्रित भएको छ ।
यसअघि प्रतिरक्षा पक्षले सोमबार आफ्नो साक्षी बयान टुंग्याउने र त्यसपछि अभियोजन पक्षले जवाफी साक्षी प्रस्तुत गर्ने अपेक्षा गरिएको थियो । मंगलबार अन्तिम बहस हुन सक्ने र बिहीबारसम्म जुरीले फैसला दिन सक्ने अनुमान गरिएको छ । मुद्दाको मुख्य प्रश्न ममताको मृत्यु हत्या थियो वा आत्महत्या भन्ने नै हो । भट्टले शव लुकाएको स्वीकार गरे पनि हत्या अस्वीकार गरेका छन् । अब जुरीले अभियोजन पक्षले प्रस्तुत गरेका प्रमाण, भट्टको बयान र प्रतिरक्षा पक्षका विशेषज्ञको भनाइलाई कसरी मूल्यांकन गर्छ, त्यसले मुद्दाको परिणाम निर्धारण गर्नेछ । एजेन्सीहरूको सहयोगमा ।
.jpg)
