काठमाडौं : नेपालीका ठूला चाड दशैं र तिहार सकिएपछि वैदेशिक रोजगारले गति ल्याउला ? विगत वर्षको अनुभवले गतिल्याउनु पर्ने हो । तर गत फागुनदेखि वैदेशिक रोजगारीमा कामदार पठाउन नसकेका व्यवसायीहरू उत्साहित हुन सकेका छैनन् । कारण हो, कोरोनाको संक्रमण र त्यसलाई देखाएर नेपाली कामदारका लागि आउने डिमाण्ड प्रमाणीकरण गर्न आनाकानी गर्ने विदेशस्थित नेपाली दूतावासहरूको प्रवृत्ति ।
लामो समयदेखि रोजगारदाताहरूले पेश गरेका डिमाण्ड प्रमाणीकरण नभएपछि श्रम, रोजगार तथा सामाजिक सुरक्षा मन्त्रालयले नेपाली कामदारका लागि पेश हुने मागपत्र प्रमाणीकरण प्रक्रिया तत्काल अघि बढाउन विदेशस्थित नेपाली दूतावास तथा नियोगहरुलाई निर्देशन दिन गत कात्तिकमा परराष्ट्र मन्त्रालयलाई पत्राचार गरेको थियो । तर बिहीबारसम्म पनि विदेशस्थित दूतावासहरूले मागपत्र प्रमाणीकरण शुरू नगरेको नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्रप्रसाद ढकालले बताए ।
मन्त्रिपरिषद्ले गत असार १४ गते वैदेशिक रोजगारीमा जाने नयाँ कामदारहरुका लागि श्रम स्वीकृति खुला गर्ने निर्णय गरेपनि विदेशस्थित नेपाली दूतावास तथा नियोगहरुले हालसम्म पनि कोरोना भाइरस संक्रमण बढिरहेको भन्दै मागपत्र प्रमाणीकरण गरेका छैनन् । त्यसबाट एक लाखभन्दा बढी नेपाली कामदारहरुका लागि तयार भएका मागपत्र अलपत्र परेको नेपाल वैदेशिक रोजगार व्यवसायी संघले बताएको छ ।
श्रम मन्त्रालयले परराष्ट्र मन्त्रालयलाई गरेको पत्राचारमा तत्काललै देखि मागपत्र प्रमाणीकरणको प्रवन्ध गर्न सम्वन्धित दूतावासहरुलाई निर्देशन दिन आग्रह गरिएको थियोे । मागपत्र प्रमाणीकरण प्रक्रियालाई निरन्तरता दिई वैदेशिक रोजगारीलाई सहजीकरण गरिदिन समेत श्रम मन्त्रालयको आग्रह छ ।
कोरोना संक्रमण कम भएका र स्वास्थ्य प्राटोकललाई कडाईका साथ पालना गरिरेहका खाडी मुलुक, मलेसिया तथा यूरोपका कतिपय रोजगार गन्तव्य देशबाट नेपाली कामदारका लागि माग आएको भन्दै संघले मागपत्र प्रमाणीकरण प्रक्रिया शुरु गराउन श्रम, रोजगार तथा सामाजिक सुरक्षा मन्त्री, सचिव तथा वैदेशिक रोजगार विभागका महानिर्देशकको पटक–पटक ध्यानाकर्षण गर्दै आएको छ ।
खाडी मुलुक, मलेसिया तथा यूरोपका देशमा कामदार पठाउने मुलुक धेरै रहेको भन्दै नेपालले मागपत्र प्रमाणीकरण गरी कामदार नपठाए नेपाली कामदारले पाउने अवसर अन्यत्र जानसक्ने खतरा रहेको व्यवसायीहरुले पटक–पटक सचेत गराउँदै आएका छन् ।
कोरोनाको बढ्दो संक्रमणका बीच कामदार पठाए उनीहरु संकटमा पर्ने नेपाली दूतावासहरूको भनाइ छ । तर सेटिङमा भिजिट भिसामा गएर उतै रोजगारी खोज्ने क्रम केही दिनयता ह्वात्तै बढेको छ । भिजिट भिसाको यस्तो धन्दा केही व्यवसायीले नै भित्रभित्रै गरिरहेको श्रोतले बतायो ।
भिजिट भिसामा जानेहरुको यात्राका बारेमा नियन्त्रण गर्ने जिम्मेवारी त्रिभुवन विमानस्थल अध्यागमन विभागको भएपनि अध्यागमन अधिकारीहरुले ‘भिजिट भिसा’मा जानेहरुलाई लुसुलुसु पठाउने गरेको एसोसिएसनका अध्यक्ष ढकालले दाबी गरे । नेपालबाट भिजिट भिसामा यूएई जाँदा कम्तीमा ४ लाख रुपैयाँसम्म असुल्ने गरिएको पीडितहरुको भनाइ आएको भन्दै अध्यक्ष ढकालले यूएईमा भनेजस्तो रोजगारी नपाउने र त्यसपछि उनीहरू सहयोगका लागि दूतावासमा पुग्ने गरेको बताए । हाल दैनिक ३ सय देखि ४ सय नेपाली युवा युवती भिजिट भिसामा जाने आंकलन व्यवसायीहरूको छ । डिमाण्ड प्रमाणीकरण शुरू गरे अवैध र असुरक्षित बाटोबाट जानेक्रम रोकिने व्यवसायीसहित विज्ञहरूको भनाइ छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies