साउदी अरब : साउदी अरबको पूर्वी क्षेत्र दमाममा इदको अवसरमा आयोजित दोस्रो दम्माम भेट्रान गोल्डकपको उपाधि युनाइटेड फुटबल क्लबले जितेको छ । फाइनल खेलमा समरानी फुटबल क्लबलाई २–० गोल अन्तरले पराजित गर्दै युनाइटेडले उपाधि जितेको हो ।
विजेता युनाइटेडले ७ हजार साउदी रियाल नगद, प्रमाणपत्र, मेडल र शिल्ड प्राप्त गर्यो भने उपविजेता समरानीले ४ हजार साउदी रियाल नगद, प्रमाणपत्र, मेडल र शिल्ड प्राप्त गर्यो ।
प्रतियोगितामा उत्कृष्ट गोलकिपर उज्ज्वल घिमिरे, उत्कृष्ट डिफेन्डर विशाल पुन, उत्कृष्ट मिडफिल्डर सन्दिप राई र एमभीपी योञ्जन हमाल घोषित भए । उपाधि जितेपछि युनाइटेडका व्यवस्थापक ओमबहादुर कुमालले खेलाडीहरूको मिहिनेतको प्रशंसा गर्दै सहयोगी सबैलाई धन्यवाद दिए ।
दम्माम भेट्रान क्लबद्वारा आयोजित प्रतियोगितामा १६ टिमको सहभागिता थियो । क्लबका अध्यक्ष पदम महतका अनुसार प्रतियोगिता सौहार्दपूर्ण वातावरणमा सम्पन्न भएको थियो । उनले प्रायोजक, आयोजक टोली, सहभागी क्लब, खेलाडी र दर्शकहरूलाई धन्यवाद व्यक्त गरे ।
यसैगरी रियादमा भएको नवौं सगरमाथा गोल्डकप २०२५ को फाइनल खेलमा रियाद फुटबल क्लब रातो र रियाद फुटबल क्लब निलोबीच प्रतिस्पर्धा भएको थियो । तर दुबै टिमको आपसी सहमतिमा रियाद फुटबल क्लब रातोलाई प्रथम र रियाद फुटबल क्लब निलोलाई द्वितीय घोषित गरियो ।
आयोजक सगरमाथा फुटबल क्लबले दुवै टिमका खेलाडी, प्रशिक्षक, व्यवस्थापन र पदाधिकारीहरूलाई बधाई तथा शुभकामना दिएको छ ।
यसैगरी, इद बिदाको अवसरमा जुबेलमा प्रवासी मिलन एकता समाजले खुला पुरुष भलिबल प्रतियोगिता पनि आयोजना गरेको थियो ।
.jpg)
