साउदी अरब : साउदी अरेबियाको पूर्वी क्षेत्र जुबेलमा रमजान ईदको अवसरमा आयोजित खुल्ला पुरुष भलिबल प्रतियोगिताको उपाधि गण्डकी प्रदेश भलिबल टिमले जितेको छ । गण्डकीले आयोजक प्रवासी मिलन एकता समाजलाई फाइनलमा पराजित गर्दै उपाधि चुमेको हो । प्रतियोगिताको तेस्रो स्थान तालपोखरी भलिबल टिमले प्राप्त गरेको छ।

प्रतियोगितामा खुल्लातर्फ प्रथम, द्वितीय र तृतीय स्थान हासिल गर्ने टोलीहरूले क्रमशः ५१००, ३१०० र २१०० रियाल, प्रमाणपत्र, मेडल र ट्रफी प्राप्त गरेका छन् । त्यसैगरी खुल्लातर्फ उत्कृष्ट खेलाडी अमीर कार्की र उत्कृष्ट टिम आयोजक प्रवासी मिलन भएका छन् ।

त्यसैगरी, ४० वर्षमाथिको भेट्रानतर्फ अल्मुजाईदिन, आयोजक प्रवासी मिलन र पाल्पा समाज क्रमशः प्रथम, द्वितीय र तृतीय भएका छन्। विजेताहरूले क्रमशः १५००, १००० र ५०० रियाल, प्रमाणपत्र, मेडल र ट्रफी प्राप्त गरेका छन्। भेट्रानतर्फ उत्कृष्ट खेलाडी करण पुन र उत्कृष्ट टिम आयोजक प्रवासी मिलन घोषित भए । विजेता टिम र खेलाडीहरूलाई समाजका अध्यक्ष काजी गुरुङले नगद, प्रमाणपत्र र मेडल प्रदान गरेका थिए । 

सन् २०१३ मा स्थापना भएको प्रवासी मिलन एकता समाजको आयोजनामा भएको प्रतियोगिता जुबेलस्थित अल गोसाईबी क्याम्पको खेल मैदानमा सम्पन्न भएको थियो । प्रतियोगिताको खुल्लातर्फ ३० टिम र भेट्रानतर्फ १२ टिमको सहभागिता रहेको आयोजक ख्यामराज खनालले जानकारी दिए। आयोजक खनालका अनुसार प्रतियोगिता सौहार्दपूर्ण वातावरणमा सम्पन्न भएको थियो । उनले प्रायोजक, आयोजक टोली, सहभागी क्लब, खेलाडी र दर्शकहरूलाई धन्यवाद व्यक्त गरेका छन् ।

समाजले स्थापनाकालदेखि भलिबल प्रतियोगिताका साथै साउदीमा विभिन्न समस्यामा परेका नेपाली श्रमिक र नेपालमा आइपरेका प्राकृतिक प्रकोप तथा मानवीय समस्याहरूमा उल्लेखनीय सहयोग गर्दै आएको छ ।