वीरगन्ज :वीरगन्जमा आयोजना भएको मधेश साहित्य महोत्सवमा मधेश आन्दोलनबारे चर्चा भएको छ ।
शुक्रबार र शनिबार गरी २ दिनसम्म चलेको महोत्सवको अन्तिम दिन शनिबार ‘समथर मधेश संघर्षका नागबेली’ विषयक छलफलमा मधेश आन्लोलनबारे मन्थन गरिएको हो ।
चर्चामा सहभागी वक्ताहरूले मधेशमा ३ पटकसम्म भएको मधेश आन्दोलनले मधेशीलाई पहिचान र सम्मान दिलाउन केही हदसम्म सफल भएपनि आन्दोलनबाट प्राप्त उपलब्धिहरूको लाभ मधेशीकेन्द्रित दलका नेताहरूले मात्र लिएको टिप्पणी गरे ।
मधेश आन्दोलनका एजेन्डामध्ये मधेशीको पहिचान र सम्मान प्रमुख भएको उल्लेख गर्दै उनीहरूले मधेश आन्दोलनले त्यो दिलाउन सफल भएको बताए । तर आन्दोलनबाट प्राप्त अन्य उपलब्धिहरूको लाभ लिनबाट मधेशी जनता वञ्चित भएको उनीहरूको भनाइ थियो ।
पूर्वराजदूत विजयकान्त कर्णले मधेश आन्दोलन समानताको आन्दोलन भएको बताए । ‘मधेशीले हामी पनि नेपाली नागरिक बराबरको नागरिक नै हौं भन्ने चिनाउनका लागि मधेश आन्दोलन गरेका थिए । जुन अहिले केही हदसम्म सफल भएको छ । तर मधेशीमाथिको विभेद पूर्ण रूपमा भने अझै अन्त्य हुनसकेको छैन’, उनले भने ।
आन्दोलनबाट प्राप्त अन्य उपलब्धिहरूको लाभ नेताले मात्रै लिइरहेको उनको टिप्पणी थियो । मधेश आन्दोलन गरेका मधेशी जनता अहिले ठगिएको कर्णले बताए ।
मधेश आन्दोलनले लोकतन्त्र र गणतन्त्रलाई पनि बलियो बनाएको धारणा उनले राखे । सत्ताको मोह र आकर्षणमा मधेशका नेताहरू परेका कारण मधेश आन्दोलनका मुद्दा र आन्दोलनबाट प्राप्त उपलब्धिहरू स्थापित हुन नसकेको उनको भनाइ छ ।
मधेशी नेताहरूको सत्ताप्रतिको आकर्षणकै कारणले मधेश आन्दोलनका कतिपय मुद्दाहरू अहिलेसम्म पनि सम्बोधन हुन नसकेको उनले बताए । विश्लेषक तुलानारायण साहले मधेश आन्दोलनका प्रमुख मुद्दाहरू पहिचान, सम्मान, संघीयता र समावेशी प्रतिनिधित्व रहेकोमा ती मुद्दाहरू केही हदसम्म सम्बोधन भएको बताए । मधेशका दलित अधिकारकर्मी भोला पासवानले पनि मधेश आन्दोलनबाट प्राप्त उपलब्धिको लाभ मधेशी दलका नेताहरूले मात्रै लिइरहेको बताए ।
अर्थशास्त्री राकेश मिश्रले मधेशमा मधेशी जनताले आजसम्म गरेका कुनै पनि राजनीतिक आन्दोलन वा विद्रोहलाई काठमाडौंको शासन सत्ताले नेपाली जनताकै हो भनेर स्वीकार नगरेको जिकिर गरे ।
