काठमाडौं : नेपाली सेनाका फलोअर्स र सिपाहीले अब सेवा अवधिको १६ वर्षमै निवृत्तिभरण (पेन्सन) पाउने भएका छन् । गत पुस २९ गते बसेको मन्त्रिपरिषद बैठकले सैनिक सेवा (तेस्रो संशोधन) नियमावली २०७७ स्वीकृत गरेसँगै सिपाहीले १६ वर्षमै पेन्सन पाउने भएका हुन् ।
मन्त्रिपरिषद बैठकका निर्णयहरु सार्वजनिक गर्न बुधबार आयोजित पत्रकार सम्मेलनमा सञ्चार तथा सूचना प्रविधि मन्त्री पार्वत गुरुङले सैनिक सेवा (तेस्रो संशोधन) नियमावली २०७७ स्वीकृत गर्ने निर्णय भएको जानकारी दिए । सैनिक सेवा नियमावली २०६९ लाई संशोधन गरी सैनिक कर्मचारीको पसुती बिदा र निवृत्तिभरणको अवधि परिवर्तन गरिएको हो ।
सैनिक सेवा नियमावलीको नियम ५८ मा संशोधन गरी उपनियम (१) मा प्रसुती बिदाको अवधि ६० दिनको ठाउँमा ९८ दिन कायम गरिएको छ । उक्त परिवर्तनसँगै अब महिला सैनिक कर्मचारीले ९८ दिनको प्रसुती बिदा पाउने भएका छन् । यस्तै, नियमावलीको नियम ८० मो संशोधन गरी उपनियम (२) मा रहेको सेवा अवधिलाई परिवर्तन गरिएको छ । जसअनुसार अब फलोअर्स र सिपालीले १६ वर्ष सेवा अवधि पूरा गरी स्वैच्छिक अवकास रोजे निवृत्तिभरण (पेन्सन) पाउने भएका छन् ।
सैनिक सेवा नियमावली २०६९ मा सेनाका फलोअर्स र सिपाहीको पन्सन अवधि १६ वर्ष नै थियो । तर, बीचमा सरकारले सबै निकायमा सेवा अवधिको उमेरमा एकरुपता ल्याउन भनेर २० वर्ष बनाएको थियो । १६ वर्षको पेन्सन अवधि बढाएर २० वर्ष बनाइएपछि नेपाली सेनाका तल्लो तहका कर्मचारी (सिपाही)ले असन्तुष्टि पोख्दै आएका थिए ।
पेन्सन अवधि बढाइँदा सिपाहीले बीचमै जागिर छाड्ने क्रम बढेपछि प्रधानसेनापति पूर्णचन्द्र थापाले त्यसलाई परिवर्तन गर्नुपर्ने भन्दै लबिङ बढाएका थिए । प्रधानसेनापति थापाकै पहलमा सरकारले सेनाको पेन्सन अवधिमा हेरफेर गरेको हो ।
अब नेपाली सेनाका सहायक सेनानी र सोभन्दा माथि महारथीसम्मका कर्मचारीको हकमा २० वर्ष, सुवेदार र प्रमुख सुवेदारको हकमा १९ वर्ष, जमदारको हकमा १८ वर्ष, प्युठ, अमल्दार र हुद्दाको हकमा १७ वर्ष तथा फलोअर्स र सिपाहीको हकमा १६ वर्ष सेवा अवधि कायम गरिएको हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies