सुशील सुवेदी/मध्यान्ह
सिन्धुपाल्चोक : बहुप्रतिपक्षी मेलम्ची मेलम्ची खानेपानी आयोजनाको साढे २६ किलोमिटर सुरुङमा पुनः पानी भर्न परीक्षण शुरु गरिएको छ । २०४८ देखि नै राजधानी उपत्यकामा पानी ल्याउन भनेर अगाडि बढाएको बहुप्रतिक्षित मेलम्चीकै कारण लगातार सरकारको आलोचना हुने गरेको छ । हरेक खानेपानी मन्त्रीले मेलम्चीको पानी आउने मिति तय गर्ने, तर पानी भने नआउने नियति नै बनेको छ ।
दुई तिहाइ नजिकको वाम सरकारको प्राथमिकतामा समेत परेको मेलम्ची आयोजना अझै पूरा हुन सकेको छैन । गत असार २१ गतेदेखि पानी परीक्षण शुरु गरेको आयोजनाले ३० गते १७ नं गेट फुटेर परीक्षण स्थगित गरिएको थियो । त्यस दुई जनालाई खोलाले बगाएको समेत थियो । दुई मध्ये एक जनाको शव फेला परेको छ भने एकजनाको शव अझै फेला परेको छैन ।
फेरि, मणिचन्द्र थापा मन्त्री बनेर आएपछि सुरुङमा पानी भर्ने परीक्षण शुरु गरिएको छ । सोमबार खानेपानी मन्त्रालय र मेलम्ची खानेपानी विकास समितिले आवश्यक सम्पूर्ण प्राविधिक काम पूरा गरेसँगै पानी हालेर परीक्षण गरिएको हो । पानी परीक्षण गर्न खानेपानीमन्त्री मणि थापा, युवा तथा खेलकूदमन्त्री दावा तामाङ, शहरी विकास राज्यमन्त्री रामवीर मानन्धर र पूर्वकानूनमन्त्री शेरबहादुर तामाङ लगायत पुगेका थिए । आयोजनास्थल अम्बाथान सुरुङमा नै औपचारिक कार्यक्रम गरेर काम अगाडि बढाइएको हो ।
मन्त्री थापाले पानी काठमाडाँै लगेर वितरण गर्न सक्यो भने ठूलो उपलब्धि हासिल हुने बताए । आयोजनाका बारेमा आफूलाई खासै ज्ञान नभएको भन्दै सचिव र इन्जिनीयरसँग समन्वय गरिरहेको बताए । पूर्वमन्त्री तामाङले पानी पथान्तरण गरिसकेपछि जिल्लावासीले पाउने लेभीको टुंगो छिट्टै लाग्ने विश्वास व्यक्त गरे । तामाङले पानी लगिसकेपछि काठमाडौँले सिन्धुपाल्चोकको विकास निमार्णको काममा उच्च प्राथमिकता दिनुपर्नेमा जोड दिए ।
आयोजनाको मुख्य दातृ निकाय एसियाली विकास बैंक (एडिबी)को अनुदान सहयोगअन्तर्गत चारजना विशेषज्ञको टोलीले सुरुङ, मुहानस्थल, गेटलगायत संरचनाको पुनः जाँच गरेको थियो । “विशेषज्ञहरूले निरीक्षण गर्नुभयो, उहाँका महत्वपूर्ण सुझावलाई समावेश गरी पुनः परीक्षणका लागि तयार गरिएको छ” आयोजनाका कार्यकारी निर्देशक तिरेश खत्रीले भने ।
विगतको जस्तो दुर्घटना नहोस् भन्नका लागि आयोजनाले यसपालि विशेष सतर्कता अपनाएको खत्रीले बताए । परीक्षणका क्रममा हेलिकप्टरलाई तयारी अवस्थामा राखिएको छ । उद्धार योजना बनाएर धुलिखेल तथा काठमाडौँका विभिन्न अस्पतालसँग समन्वय गरिएको छ ।
कार्यकारी निर्देशक खत्रीका अनुसार सिन्धुपाल्चोकको मेलम्ची खोलादेखि काठमाडौँको सुन्दरीजलसम्मको साढे २६ किलोमिटर सुरुङ भर्न १६ दिन लाग्नेछ । शुरूआती चरण भएकाले सुरुङको क्षमताअनुसार पानी नछाडिने उनले बताए ।
