काठमाडौं : केही दिनअघि मात्रै नेपाल चलचित्र प्राविधिक संघ र ड्रिम हाइ नेपालको संयुक्त आयोजनामा एलआइसी प्रिजेन्ट ‘१०औ नेफ्टा फिल्म अवार्ड २०७७’ भब्य रुपमा सम्पन्न भयो । उपराष्ट्रपति नन्दकिशोर पुनको प्रमुख आतिथ्यतामा सम्पन्न कार्यक्रममा वर्ष २०७५ भरी प्रदर्शनमा आएका मध्येबाट उत्कृष्ट विभिन्न फिल्म तथा फिल्मकर्मीहरुलाई अवार्ड वितरण गरिएको थियो । कुल ३६ विधामा वितरण गरिएको अवार्डतर्फ उत्कृष्ट फिल्मको अवार्ड छक्का पञ्जा ३ ले जितेको थियो ।
सो अवार्ड कार्यक्रमका संयोजक थिइन् गिता पौडेल (सुष्मा) । करिब २ दशकदेखि चलचित्र प्राविधिक (हेयर स्टालिष्ट) को रुपमा रंगमञ्चमा योगदान दिँदै आएकी गिताले नेपाल चलचित्र प्राविधिक संघको बोर्डको तर्फबाट पहिलो महिलाको रुपमा अवार्ड कार्यक्रमको सफल संयोजन गरेकी हुन् ।
८० भन्दा बढी चलचित्रमा हेयर स्टालिष्टको भूमिकामा योगदान दिएकी गिताको लागि यो एउटा ठुलो जिम्मेवारी थियो । ‘१०औ नेफ्टा फिल्म अवार्ड २०७७’ राम्रोसँग सफल भएकोमा संयोजन लगायत सबै टीमलाई बधाई आएको र त्यसबाट आफु अत्यन्तै खुशी भएको गिताले बताइन् । उनी भन्छिन्, ‘स्वार्थ नहेरी काम गर्न चाहे र साथ दिने टीम पनि भए सफल भइँदो रहेछ’ ।
हुन त चलचित्र क्षेत्रमा पर्दा अगाडिका कलाकारको जति चर्चा र सम्मान हुन्छ, त्यति पर्दा पछाडिका हिरा भनिने प्राविधिकहरुको हुँदैन । तर त्यसको पनि नजिर तोडिएको गिताको दाबी छ । अहिले चलचित्र प्राविधिकहरुको ठुलो सम्मान हुन थालेको उनी बताँउछिन् ।
आफुले कार्यक्रमको त्यसरी संयोजन गर्न सक्नुमा नेपाल चलचित्र प्राविधिक संघका अध्यक्ष पुष्कर लामा र ड्रिम हाइ नेपालका अध्यक्ष कमल जिसीको महत्वपूर्ण सहयोग रहेको गिता बताउँछिन् ।
गिताले संयोजन गरेको ‘१०औं नेफ्टा अवार्ड २०७७’ वितरण कार्यक्रममा सबै नयाँ तथा पुराना कलाकारको बाक्लो उपस्थिति रहेको थियो । नायिका विपना थापा लगायत कतिपय कलाकारहरुले त अवार्ड वितरण कार्यक्रमकी संयोजक गिताको मिहेनत र कामको खुलेरै प्रशंसा गरेका थिए ।
अवार्ड संयोजक गीताले सम्पुर्ण प्राविधिक, कलाकार, सञ्चारकर्मी, ब्राण्ड पार्टनरलगायत सबैको साथले मात्रै अवार्ड वितरण कार्यक्रम भव्य बन्न सकेको भन्दै सबैलाई धन्यवाद दिएकी थिइन् । कार्यक्रम सोल्टी क्राउन प्लाजामा ५ सयभन्दा बढीको सहभागितामा सम्पन्न भएको थियो ।
२०५६ सालमा स्थापना भएको नेपाल चलचित्र प्राविधिक संघमा हेयर स्टालिष्ट गिता ९ वर्षदेखि सञ्चालक समितिमा रहेर कार्य गरिरहेकी छिन् । सुरुका केही वर्ष सदस्य रहेकी उनी अहिले कोषाध्यक्षको जिम्मेवारीमा छिन् । हाल सो संस्थामा २ हजार भन्दा बढी सक्रिय सदस्य छन् ।
संघले प्राविधिकहरुको हकहित प्रबर्द्धनका लागि बढी भन्दा बढीलाई समेटेर कल्याणकारी कोष समेत खडा गरेको छ । सो कोषलाई प्रभावकारी बनाउन आफुले पनि शसक्त भूमिका खेलेको गिता बताउँछिन् । लेबी रकमलाई व्यवस्थित गर्दै कोषलाई बलियो बनान आफु हरतरहले कोषाध्यक्षको भूमिकामा काम गरिरहेको उनी बताउँछिन् । उनको टीमले कल्याणकारी कोषमा सहभागिता जनाउनेहरुलाई १८–२० वर्षमा डबल रकम पाउने गरी पेन्सन जस्तो व्यवस्था पनि गरेको छ । कोषलाई अझ व्यवस्थित बनाउने र चलचित्र प्राविधिकहरुको हकहितमा अझै शसक्त तवरले योगदान दिने चाहना रहेको गिताले बताइन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies