शुभ नारायण कामती/मध्यान्ह
सिरहा : सिरहाको पूर्वी क्षेत्रको नाकाको रुपमा रहेको ठाँडीमा सयौं सवारी साधन थुप्रिएको छ । चोरी तस्करीका क्रममा प्रहरीले पक्राउ गरेको सवारी साधनदेखि चोरीका गाडीहरुमा पनि ठाँडी भन्सार कार्यालयको परिसर र यार्डमा राखिएको छ । वषौंदेखि भन्सार कार्यालयको परिसर र यार्डमा राखिएको सवारी साधन भन्सार कार्यालय ठाँडीका प्रमुखको लापरबाहीको कारणले कुहिन थालेको छ ।
करोडौं मूल्यमा बिक्री भई राज्यलाई राजश्व उठ्ने भएपनि भन्सार कार्यालयका प्रमुख नरेश साहकै कारणले सवारी साधन कुहिन पुगेको हो । भन्सार कार्यालय परिसर र यार्डमा जीप, कार, मोटरसाइकल, भ्यान, म्याजिक, ट्रयाक्टरहरु लिलामी गर्न वर्षौंदेखि राखिएको छ । उक्त भन्सार कार्यालयका प्रमुख साहले कानूनी प्रक्रिया पूरा नगर्दा सवारी साधन लिलामी हुन सकेको छैन ।
भन्सार कार्यालयमा सयौंको संख्यामा मोटरसाइकल, दर्जन वढी चारपांग्रे सवारी साधन लिलामी प्रक्रियाका निम्ति राखिए पनि अहिले कुहिएर कवाडीको भाउमा बेच्नुपर्ने बाध्यता आइपरेको छ । भन्सार प्रमुख साहले करोडौं रुपैयाँ राजश्व असुली हुन सक्ने सवारी साधनलाई विभिन्न कारणले कानून प्रक्रिया अगाडि नबढाएपछि यस्तो अवस्था आएको हो । भन्सार प्रमुख साहलाई सवारी साधनको लिलामी प्रक्रिया कहिले शुरु हुने र राजश्व असुली हुने भन्ने जानकारी लिँदा चाँडै नै प्रक्रिया शुरु गर्ने बताएका छन् ।
‘अहिले लिलामी हुँदा राम्रो मूल्यमा लिलामी हुन सक्थ्यो,’ स्थानीय अगुवा मनोज मण्डलले भने, ‘कार्यालयले बेवास्ता गरेपछि कुहिएर कबाडीको भाउमा बिक्री गर्नुपर्ने अवस्था आइपर्छ ।’
‘नयाँमा लिलामी गर्दा स्पेयर पार्टसपनि दुरुस्त हुँदा मूल्य बढी लाग्ने कुरा स्वाभाविक हो । तर जति ढिला भयो त्यति कम मूल्य लाग्छ,’ जानकार मण्डलले भने, ‘यसमा कार्यालयको गम्भीर लापरबाही हो । राज्यलाई राजश्वको नोक्सानी पनि हुन्छ ।’
भन्सार कार्यालय ठाँडीका सूचना अधिकारी कमल चन्द्र विष्टले भन्सार कार्यालयको क्षेत्राधिकार बढाएर स्तरोन्नती गरीएको करिब तीन आर्थिक वर्ष बितिसकेको तर कर्मचारी अभावले कति सवारी साधन लिलामी प्रक्रियामा जाने यकिन हुन नसकेको बताएका छन् । ‘के कति मोटरसाइकल, जिप लिलामी प्रक्रियामा लग्नुपर्ने हो त्यो यकिन छैन,’ सूचना अधिकारी विष्टले भने, ‘लामो समयदेखि कार्यालय परिसर र यार्डमा सवारी साधन थन्किएको छ ।’
भन्सार प्रमुख साहले सवारी साधन लिलामी प्रक्रियालाई कर्मचारी अभावको वहानामा ढिलाई गर्दै आएका छन् । लिलामी प्रक्रियामा जाने सवारी सधानको कागजी प्रक्रियाहरु दुरुस्त बनाएर मेकानिकल इन्जिनियरसँग मूल्यांकन गरी प्रक्रिया अगाडि बढाउन नसक्दा करोडौंमा बिक्री हुने सवारी कवाडी भाउमा बिक्री हुने जोखिम बढेको छ ।
भन्सार कार्यालय ठाँडीको लापबाहीले राजस्वमा क्षति हुने भएकोले त्यसलाई नियमन गर्न आवश्यक रहेको जानकारहरु बताउँछन् । जिल्ला प्रशासन कार्यलय सिरहाले पनि ठाँडी भन्सार कार्यालयले लिलामी प्रक्रियालाई अगाडि नबढाउँदा हुने राजस्व नोक्सानीबारे जानकार हुनु जरुरी छ र त्यस अनुसारको कारबाही प्रक्रियामा लैजान जरुरी रहेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies