.jpg)
काठमाडौं : यूएईले नेपाललाई कोरोना संक्रमणको उच्च जोखिम भएको देशको सूचीमा यथावत राखेको छ । यूएईको नागरिक उड्डयन प्राधिकरण (जीसीएए)ले आइतबार नयाँ नियम जारी गर्दै नेपाललाई ‘रेड जोन’मै राखेको हो ।
यससँगै नेपाली नागरिकलाई यूएईले आफ्नो देश प्रवेशमा लगाएको यात्रा प्रतिबन्ध अनिश्चितकालका लागि लम्बिएको छ । जीसीएएले अर्को सूचना जारी नभएसम्म प्रतिबन्ध कामय रहने जानकारी दिएको छ ।
यूएईले नेपालसहित १६ वटा देशलाई ‘रेड जोन’मा समावेश गरेको छ । यूएईले नेपालसहित भारत, बंगालादेश, पाकिस्तान, श्रीलंका, लाइबेरिया, नामिबिया, अफगानस्तान, सिएरा लिओन, गणतान्त्रिक कंगो, इण्डोनिसया, युगान्डा, जाम्बिया, भियतनाम, नाइजेरिया र दक्षिण अफ्रिकाका नागरिकलाई पनि आफ्नो देश प्रवेशमा प्रतिबन्ध लगाएको हो ।
तर कुटनीतिक नियोग प्रतिनिधि, आपतकालिन स्वास्थ्यकर्मी, गोल्डेन भिसावाहकको सन्दर्भमा भने यो नियम लागू हुने छैन ।
यसअघि उसले २१ जुलाइसम्म नेपाली यात्रुलाई आफ्नो देश प्रवेशमा रोक लगाएको थियो । तर नेपाललाई अझै पनि कोरोनाको उच्च जोखिममा राखेपछि नेपाली कामदारहरु यूएई जान बञ्चित भएका छन् । नेपाली कामदारका लागि प्रमुख रोजगार गन्तब्यमध्ये यूएई पनि एक हो ।
सरकारले कोरोनाविरुद्धको खोपको उचित व्यवस्थापन गर्न नसक्दा कोरोना संक्रमण पनि अपेक्षितरुपमा कम भएको छैन । जसका कारण नेपाली कामदारको रोजगार गन्तब्य मुलुकहरुले नेपाललाई हेर्ने दृष्टिकोण पनि फरक बनाएको छ ।
हाल अमेरिकी सरकारले उपलब्ध गराएको कोरोनाविरुद्धको जोन्सन एण्ड जोन्सन कम्पनीको खोप अभियान शुरु भएको छ । जसअन्तर्गत वैदेशिक रोजगारमा जाने कामदारहरुलाई पनि खोप लगाउन दिइएको छ । तर खोप केन्द्रबारे पर्याप्त जानकारी नहुँदा कामदारहरुले सहजरुपमा खोप लगाउन पाएका छैनन् ।
अधिकांश खाडी लगायतका रोजगार गन्तब्य मुलुकले आफुले अनुमति दिएको खोप लगाएका नागरिकलाई मात्र प्रवेश अनुमति दिने भनेको छ । ती मुलुकले अनुमति दिएको खोपमध्ये नेपालमा जोन्सन एण्ड जोन्सनको खोप मात्र उपलब्ध छ । तर त्यस खोपमा पनि वैदेशिक रोजगारमा जाने कामदार उच्च प्राथमिकतामा नपरेपछि कयौंको रोजगारी गुम्ने तथा नयाँ कामदार रोजगारका लागि जान बञ्चित हुने अवस्था सिर्जना भएको छ ।
नेपाल वैदेशिक रोजगार व्यवसायी संघले पनि कामदारलाई खोप दिनेबारे पटक–पटक सरकारका विभिन्न निकायको ध्यानाकर्षण गराउँदा पनि कामदारलाई खोप सुनिश्चित हुन सकेको छैन । यस्तै परिस्थिति रहे नेपाली कामदारहरु वैदेशिक रोजगारमा जानै नपाउने स्थिति आउने व्यवसायीहरुले बताउँदै आएका छन् ।
