कुवेती नागरिक अब्दुल्लाह अल्मुताइरी कतार फुटबल फेडरेशनको सहयोगमा नेपाली राष्ट्रिय टिम सम्हाल्न आएपछि नेपाली टिममा केही परिवर्तन आएको छ । उनी आएपछि नेपाली टिमले विश्वकप छनोट र इराकसँगको मैत्रीपूर्ण फुटबल खेलेको छ । जसमा विश्वकप छनोट अन्तर्गत चाइनिज ताइपेईलाई जित हात पार्दा अस्ट्रेलिया र जोर्डनसँग पराजय भोगेको थियो भने ईराकसँग पनि पराजय नै चाखेको थियो । तर, प्रशिक्षकमा अब्दुल्लाह आइसकेपछि नेपाली फुटबल टिमको स्तर देखिनेगरी परिवर्तन आयो । विगतमा रक्षात्मक खेल्ने नेपाली टिम अहिले आक्रामक खेल्दै आफ्नो स्तर सुधार भएको संकेत गरेको छ । इराकविरुद्ध गोल गर्नु र चाईनिज ताइपेईलाई पराजित गर्नुले पनि नेपाली टिममा सुधारको संकेत हो ।
अहिले नेपाली टिम साफ च्याम्प्यिनसिपको तयारीमा छ । प्रशिक्षक अब्दुल्लाह नेपाल आएलगत्तै भनेका थिए ‘मेरो लक्ष्य साफ च्याम्पियनसिप जित्नु हो ।’ नेपाली टिम एसियन च्याम्पियनसिपको अर्को चरणमा प्रवेश गरेको छ भने साफको तयारी भइरहेको छ । सम्भवतः साफ नेपालमै आयोजना हुने सम्भावना अत्याधिक छ । त्यस विषयमा अर्को साता निर्णय हुन नै छ । प्रशिक्षक अहिले नेपाली टिमलाई प्रशिक्षणमा व्यस्त बनाइ राखेका बेला आइतबार उनले फेसबुकमार्फत् राजीनामा दिन अखिल नेपाल फुटबल संघ (एन्फा) जान लागेको र राजीनामाको कारण एन्फाका वरिष्ठ उपाध्यक्ष पंकजविक्रम नेम्वाङ रहेको किटानीका साथ उल्लेख गरेका थिए । जसका कारण नेपाली फुटबल यतिबेला फेरि एक पटक तरंगित भएको छ ।
एन्फामा वरिष्ठ उपाध्यक्षको हैसियतमा रहेका पंकज वर्तमान अध्यक्ष कर्माछिरिङ शेर्पासँग पटक्कै मिल्दैनन् । हुनत यी दुवै जना एउटै प्यानलबाट निर्वाचन जितेका व्यक्ति हुन् । नेपाली कांग्रेसको राजनीतिमा पनि सँगै रहने दुवै जनाको विवादका कारण यतिबेला नेपाली फुटबल फेरि धरापको अवस्थामा पर्न लागेको छ । त्यसैले अहिलेको अवस्थामा पंकजमाथि अब्दुल्लाहले जुन किसिमले आरोप लगाएका छन् त्यसको छानविन गरिनुपर्छ । साथै एन्फा भित्रको राजनीतिलाई थाती राखेर समग्रमा नेपाली फुटबलको विकासमा ध्यान दिन जरुरी छ । बल्लतल्ल नेपाली टिमले उत्कृष्ट प्रशिक्षक पाएको समर्थकहरुले बताइरहेका बेला उनलाई राम्रोसँग काम गर्न दिनुपर्छ भन्नेमा दुईमत छैन । त्यसैले अहिलेको अवस्थामा कसले कसलाई सम्मान गरेन, कसले नमस्कार गरेन भन्दा पनि समग्र नेपाली फुटबलको विकासका लागि ध्यान दिनुपर्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies