पाँच वर्षे जनमतको बलमा शक्तिशाली सरकारको नेतृत्व गर्ने अवसर बीचैमा गुमाएका नेकपा एमालेका अध्यक्ष केपी शर्मा ओलीकै वरीपरी राष्ट्रिय राजनीति अहिले पनि घुमिरहेको छ । नेपाली काँग्रेसका सभापति शेरबहादुर देउवाको नेतृत्वमा गठबन्धनका सरकार बनेपछि ओली प्रमुख विपक्षी दलका नेता हुन् । तर संसदीय शक्ति समीकरणका कारण राष्ट्रिय राजनीतिको केन्द्रमा अझैपनि ओली रहेका हुन् । किनकि एमाले संघीय संसदको प्रमुख दल हो । २७५ सदस्यीय प्रतिनिधिसभामा एमालेसँग १२१ सांसद छन् । हाल कायम संसद संख्याका आधारमा १३६ सांसद भनेको सरकार बनाउन पुग्ने बहुमत हो । अर्थात् एमालेलाई सरकार बनाउन १५ सांसद मात्रै अपुग छ । जनता समाजवादी पार्टी (जसपा) को वैधानिकता गुमाएका महन्थ ठाकुर पक्षको मन अझैपनि ओलीसँगै छ ।
७ जेठमा दोस्रो पटक प्रतिनिधिसभा विघटन गर्दा ठाकुरसँग जसपाका २० सांसदले साथ दिएका थिए । जसपाका अध्यक्ष उपेन्द्र यादवसँग १२ सांसद मात्रै थिए । यसको अर्थ ओलीले चाहेका भए त्यसैबेला पनि सरकार टिकाउन आवश्यक संख्या पुग्थ्यो । किनकि एमालेका बरिष्ठ नेता माधवकुमार नेपाल समूह पार्टी एकता गर्दा ओलीलाई साथ दिन तयार भइसकेका थिए । माधव समूहले ओलीलाई साथ दिएकै कारण संविधानको धारा ७६ (२) बमोजिम विपक्षी गठबन्धनको सरकार बन्न सकेको थिएन । त्यसपछि ३० वैशाखमा फेरि ओली धारा ७६(३) बमोजिम प्रधानमन्त्री नियुक्त भए । तर ओलीले सरकार चलाउन चाहेनन् । संसद् विघटनको बाटो रोजे । राष्ट्रपति विद्यादेवी भण्डारी र ठाकुर समूहसँगको मिलेमतोमा ओलीले असंवैधानिक कदम चालेर संसद् विघटन गरेका थिए ।
तर सर्वोच्च अदालतले संसद् पुनस्र्थापना गर्दै देउवालाई प्रधानमन्त्री नियुक्त गर्न परमादेश दियो । देउवा प्रधानमन्त्री बनेर ३ साउनमा विश्वासको मत समेत पाएका छन् । तर अझैपनि राजनीतिक अस्थिरता लम्बिने र राजनीति झनै बदनाम हुने संभावना देखिन्छ । किनकि एमालेभित्र एकताले सार्थकता पाएको छैन । यदि एमाले एकता नहुने हो भने सत्तारुढ गठबन्धनसँग दुई तिहाइ पुग्नेछ । ठाकुर समूहका सांसदहरुको पद धरापमा रहेकाले एमालेबाट माधव नेपाल समूह अलग हुनासाथ दुई तिहाइ पुग्नेछ । यसको पहिलो असर राष्ट्रपतिमाथि पर्ने खतरा छ । किनकि सत्तारुढ गठबन्धनले राष्ट्रपति भण्डारीले असंवैधानिक कदम चाल्न ओलीलाई साथ दिएको आरोप लगाउँदै आएको छ । तसर्थ अहिले पनि राजनीतिक अस्थिरता रोक्ने, संविधान कार्यान्वयन गर्दै समृद्ध राष्ट्र निर्माण गर्नतिर मुलुक अगाडि बढाउने दायित्व फेरि पनि राजनीतिक नेतृत्वको नै हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies