दिवस ढकाल/मध्यान्ह
नुवाकोट : नुवाकोटको विदुर नगरपालिकाको कार्यालयमा सोमबार भएको तोडफोडको घटनालाई लिएर विदुर नगरपालिकाले नगरका ६ जना वडाध्यक्षविरुद्ध प्रहरीमा उजुरी दर्ता गरेको छ ।
नगरपालिकाको कार्यालयले उनीहरुविरुद्ध फौजदारी संहिता २०६४ अनुसार कारवाहीको माग गर्दे जिल्ला प्रशासन कार्यालय र जिल्ला प्रहरी कार्यालयमा उजुरी दर्ता गराएको नगर प्रमुख सञ्जुु पण्डितले जानकारी दिए । नगरपालिका तोडफोड गरेको आरोपमा विदुर नगरपालिका–२ का वडाध्यक्ष विरेन्द्रकुमार शाही, वडा नम्बर ३ का वडाध्यक्ष बद्री रिमाल, वडा नम्बर ७ का वडाध्यक्ष महेन्द्र तामाङ, वडा नम्बर ८ का वडाध्यक्ष फैसिङ तामाङ, वडा नम्बर १० का वडाध्यक्ष गणेशकुमार नेपाल, वडा नम्बर १३ का वडाध्यक्ष दलवहादुर तामाङविरुद्ध मुद्धा दर्ता गरी कारवाहीको माग गरिएको नगरपालिकाले जनाएको छ ।
सोमबार विदुर नगरपालिका–१३ मा कार्यान्यनमा आएको सुन्तला कागती पकेट क्षेत्रको सम्बन्धित काममा अनियमितता भएको भन्दै कांग्रेस कार्यकर्ताहरुले नगरपालिकामा तालाबन्दी गर्ने क्रममा नगरपालिकाको कार्यालयमा तोडफोड गरिएको थियो । सोमबार भएको झडपमा स्थानिय तहको निर्वाचनमा कांग्रेसको तर्फबाट विदुर नगरपालिकाको उपमेयरका प्रत्यासी गिता अमात्य, तरुण दल वडा नम्बर १३ का अध्यक्ष रामचन्द्र लामा र ३ जना प्रहरीसमेत घाइते भएका थिए ।
नगरपालिकामा भएको तोडफोडबाट एक लाख रुपैयाँ बराबरको क्षति भएको नगरपालिकाले दाबी गरिरहेको छ । गत सोमबार नेपाली कांग्रेसले कागतीका नाममा भएको भ्रष्टाचारको विरोध गर्दै नगरपालिकाको कार्यालयमा तोडफोड गरेको थियो । नेपाली कांग्रेसले विदुर नगरपालिकाको वडा नम्बर १३ मा भएको कागतीको बेर्ना भ्रष्टाचारको विरोधमा प्रदर्शन गर्दै नगरपालिकाको कार्यालयमा तोडफोड थियो । विदुर नगरपालिकाले कागतीको बेर्नाका नाममा लाखौँ रूपैयाँ भ्रष्टाचार गरेको आरोप लागेको छ ।नगरपालिकाले वडाध्यक्ष्यहरुलाई उजुरी हालेसँगै घटना नगरपालिकाको कारणले नै भएको जिकिर गर्दै नेपाली काङ्ग्रेसबाट निर्वाचित ६ जना वडाअध्यक्षहरुले संयुक्त रुपमा विज्ञप्ति निकालेका छन् ।
‘कागती र सुन्तला पकेट क्षेत्र’ सञ्चलनको विषयमा भएको अनियमितताको विरुद्धमा आवाज उठाएको र उक्त नगरीक आन्दोलनलाई राजनितिकरण गर्न खोजिएको वडा नम्बर १३ का वडा अध्यक्ष दलबहादुर तामाङले बताए ।विदुर नगरपालिका तोडफोडको घटनामा संलग्न व्यक्तिहरु विरुद्ध कारवाहीको लागि नगरपालिकाले उजुरी दिएको जानकारी नआएको वडा नम्बर ३ का वडाध्यक्ष वद्रिप्रसाद रिमालले जनकारी दिएका छन् । आन्दोलनरत पक्षल ‘कागती र सुन्तला पकेट क्षेत्र’ कार्यक्रम सञ्चालनको लागि पानी ट्याङ्कीको निर्माण, सुन्तला र कागतीका विरुवाहरु पूर्ण भरपाई अनुसार नबाडिएको, स्थानीयको मागभन्दा कम बाडिएको, कागती र सुन्तला जातका विरुवाहरु नर्सरी बनाई त्यतिकै राखिएको, समिति गठन गर्दा स्थानीहरुलाई जानकारी नदिएको, लाभग्राहीहरुको कृतिम हस्ताक्षर बनाएको जस्ता विषयहरुलाई लिएर आन्दोलन गरेका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies