पवन जायसवाल/मध्यान्ह
बाँके : बाँकेमा ३ दिने पानीजन्य आपतकालीन खोज तथा उद्धार तालिम सम्पन्न भएको छ । नेपाल रेडक्रस सोसाइटी बाँके जिल्ला शाखाको आयोजनामा उक्त तालिमको बुधबार समापन गरिएको हो ।
कार्यक्रममा बाँकेका प्रमुख जिल्ला अधिकारी शिवराम गेलालले पहिलो उद्धारकर्ता समुदाय आफैँरहेको भन्दै उनीहरुको क्षमता विकासमा नेपाल रेडक्रसले गरेको योगदान प्रशंसानीय रहेको बताए । बाढी विपदको पूर्वतयारी गर्ने क्रममा समुदाय स्तरका व्यक्तिहरुलाई दक्ष बनाउने अभिप्रायले आयोजित प्रशिक्षणमा पानीजन्य आपतकाल, स्थानीय साधन स्रोतको प्रयोग गरी उद्धार गर्ने विधि, रबरबोट चलाउने तारिका र घाइते भएका व्यक्तिहरुलाई प्राथमिक उपचार गर्ने विधि लगायत विषयमा प्रशिक्षण दिएको थियो मुख्य प्रशिक्षक संशस्त्र प्रहरी बल शम्शेरगंजका सई टेकप्रसाद आर्चायले बताए ।
जिल्ला विपद् व्यवस्थापन समिति/आपत्कालीन कार्यसंचालन केन्द्रको समन्वय उक्त तालिममा डुडुवा गाउँपालिका र खजुरा गाउँपालिका अन्र्तगत विपद् प्रभावित क्षेत्र भित्रका समुदाय र सोही वडामा रहेको प्रहरी चौकीका प्रतिनिधिहरु गरी २४ जनाको सहभागिता रहेको थियो ।
तालिममा सहभागीहरुले आफूहरुले पहिला पनि उद्धार गर्दै आएको तर लाइफजाकेट, रोप (डोरी) जस्ता सामग्री नहुने र केही उपलब्ध भएपनि सही तारिकाबाट प्रयोग गर्न नजानेको हुँदा जोखिम लिएर उद्धार गरेको अनुभव सुनाएका थिए । अबका दिनमा आफ्नो प्रथम सुरक्षा गर्दै सिकाइएको विधि अनुसार उद्धार गर्न सक्षम भएको पनि उनीहरुले बताएका छन् ।
तालिमको अन्तिम दिनमा डुडुवा गाउँपालिका वडा नं. ५ नानुपुर्वा स्थित पोखरीमा सीप परिक्षण अर्थात् कृत्रिम घटना अभ्यास समेत गरिएको थियो ।
नेपाल रेडक्रस सोसाइटी बाँके शाखाका सभापति गोवर्धन सिंह सम्झनाको अध्यक्षतामा सम्पन्न समापन कार्यक्रममा प्रमुख जिल्ला अधिकारी शिवराम गेलाल, शसस्त्र प्रहरी बलका प्रहरी उपरिक्षक अशोक बम, जिल्ला प्रहरी कार्यालयका नि. कार्यालय प्रमुख प्रहरी नायब उपरीक्षक मधुसुदन न्यौपाने, नेपाल रेडक्रस सोसाइटी बाँके शाखाका मन्त्री अजीज अहमद सिद्दिकी लगायतको उपस्थिति रहेको थियो । ३ दिने तालिममा शसस्त्र प्रहरी बलका टेकप्रसाद आर्चाय, रमेश थापा, रेडक्रसका दोलखबहादुर डाँगी, रुपन ज्ञवाली र प्रहलाद विश्वकर्माले सहजीकरण गरेका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies