धनराज तामाङ/मध्यान्ह
दोलखा : चिसो मौसम सुरु भएसंगै दोलखाको कालिन्चोकका ठाउँ–ठाउँमा हिउँ पर्न थालेका छन् । यससंगै आन्तरिक तथा बाह्य पर्यटकहरु दोलखामा चहलपहल बढ्न थालेको छ । अघिल्लो बर्ष कोभिडका कारण सुनसान रहेका कालिञ्चोक आसपासमा यस बर्ष पहिलो हिउँ परेसंगै पर्यटकको चहलपहल बढ्न थालेको हो ।
प्रायः शुक्रबार कालिञ्चोक आउने पर्यटकहरुको रुटिनलाई मौसमले थप राम्रो बनाएको छ । यससंगै हिउँ परिरहेको देख्दा पर्यटकहरु हिउँमा रम्दै निकै हर्षित देखिएका छन् । साथै सो ठाउँमा चलचित्र तथा गित छायांकनका क्रमहरु पनि बढ्न थालेका छन् ।
त्यसैगरी कुरी बजारमा दर्शनार्थीहरुको लागि सुविधा सम्पन्न होटल तथा लजको राम्रो ब्यवस्था रहेको छ । यहाँका व्यवसायहरु अघिल्लो बर्ष कोभिडका कारण नराम्ररी थलिएका थिए । यो बर्ष भने सुरुवातको हिउँले राम्रो संकेत गरेको होटल ब्यवसायी नवराज पाख्रिनले मध्यान्हलाई बताए ।
कोभिडका सुनसान बनेको कालिन्चोक अहिले हिउँ परेसंगै राम्रो चहल पहल बढेको कालिञ्चोक मन्दिर ब्यबस्थापन समितिका अध्यक्षसमेत रहेका पाख्रिन बताउँछन् । मन्दिर आउने बाटो अप्ठ्यारो रहेको गुनासो पर्यटकहरुले गर्दै आएका छन् । सहज बाटो भए अझ धेरैको संख्यामा पर्यटक दोलखा भित्रिन सक्ने भक्तपुर घर भएका दर्शनार्थी सुरेन्द्र श्रेष्ठले बताए ।
मुडे–चरिकोट सडक नै दोलखाको विकासको मुख्य पाटो रहेकाले बाटोलाई सहज बनाउन विभिन्न सामाजिक अभियान्तहरुद्वारा समय समयमा आन्दोलन गर्दै आएका छन् । संघर्ष समितिहरु मार्फत आन्दोलन जारी रहेको एक सामाजिक तथा नागरिक अभियन्ता रमेश खतिवडाले बताए । बाटो सहज नगरेसम्म संघर्ष समिति कहिले नथाक्ने र सर्बोच्च निकायसम्म जान पनि तयार रहेको समितिका अर्का नागरिक अभियन्ता चिरञ्जीवी मास्केले मध्यान्हलाई बताए ।
कोभिडबाट थलिएर बिस्तारै बामे सर्न लागेको तर हरेक जिल्ला आउने बाटो असहज भएकै कारण दोलखा हरेक हिसाबले पछाडि परेको दोलखालीहरुको गुनासो छ । दोलखामा यस वर्ष धेरै पर्यटक भित्र्याउने सपना सपनमा मात्रै सिमित नराख्न जिल्लाका व्यवसायीहरुले सरोकावाला निकायलाई निरन्तर ध्यानाकर्षण गराइरहेका छन् ।
जिल्लामा आउने सडक बाटो सहज बनाउन सके सन् २०२२ मा अनुमानित गरेभन्दा बढी पर्यटक तथा दर्शनार्थी आउने होटल ब्यवसायी संघ दोलखामा अध्यक्ष रन्जित कुमार पाठक (सन्तोष) ले बताए ।
यस वर्ष धेरै पर्यटक तथा दर्शनार्थीहरुले सहज रुपमा मन्दिर दर्शन गर्न पाउन भन्ने उद्देश्यले व्यवस्थापन गरिएको छ । मन्दिर बिहान ६ बजे नै खोल्ने र बेलुका ४ बजे बन्द गर्ने गरि ब्यबस्था गरिएको मन्दिर ब्यबस्थापन समितिका अध्यक्ष पाख्रिनले बताए । मंसिर महिनाको सुरुको समयमा नै हिउँ परेकाले कालिन्चोकका स्थानीयहरु निकै खुसी भएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies