चितवन जारी नेकपा (एमाले)को महाधिवेशनले पदाधिकारी र केन्द्रीय सदस्य छान्ने सर्वाधिकार पार्टी अध्यक्ष केपी शर्मा ओलीलाई दिएको छ । पदाधिकारी चयनमा सहमति नबनेपछि संगठन विभाग प्रमुख विष्णु पौडेलले पदाधिकारी र केन्द्रीय सदस्य छान्ने जिम्मा ओलीलाई दिन गरेको प्रस्तावलाई बन्द सत्रले पारित गरेको हो । बन्द सत्रले पदाधिकारी र केन्द्रीय सदस्यको चयनकै अधिकार दिएसँगै ओली वैधानिक रुपमै थप शक्तिशाली बनेका छन् । उनी पार्टी निर्विकल्प नेतृत्वको रुपमा स्थापित पनि भएका छन् । एमालेमा महाधिवेशनको सुरुवातीसँगै पदाधिकारी चयनका विषयमा निकै विवाद देखिएको थियो । वरिष्ठ उपाध्यक्ष र महासचिवका पद प्राप्तिकै लागि थुप्रै समूहहरु खडा भएका थिए ।
शनिबार पदाधिकारी चयनमा देखिएको विवादकै कारण बन्द सत्र शुरु हुन ढिलाई भएको थियो । पछिल्लो निर्णयसँगै विवादका विषयहरु हल हुने देखिएको छ । बन्द सत्रले ओलीको निर्णयलाई चित्त नबुझे चुनावमा उठ्ने अधिकार त दिएको छ तर, कमजोर देखिएको १० बुँदे समूह र पूर्वमाओवादी समूह बलियो संस्थापन समूह अगाडि हराउने देखिन्छ । असन्तुष्ट समूहले तबबिजका निर्णयलाई स्वीकार गर्नुपर्ने स्पष्ट छ । बहुमत समूहले गरेको निर्णयलाई अस्वीकार गर्ने विषय नरहला तर, लोकतान्त्रिक अभ्यासमा भने ठूलो धक्का पुग्ने देखिन्छ । बन्द सत्रले गरेको यो निर्णयले लोकतान्त्रिक भनिएको एमालेको छबिमा नराम्रो असर गर्ने पक्का छ । साथै एमालेभित्र बढ्दै गरेको व्यक्तिको देवत्वकरणलाई टेवा दिने देखिन्छ ।
नवौं महाधिवेशनसँगै पार्टी अध्यक्ष ओलीले स्थापित गरेका मान्यताविरुद्व पटक–पटक एमालेभित्र विद्रोह भएको थियो । तत्कालिन नेपाल कम्युनिष्ट पार्टी (नेकपा)मा आएको विभाजन पनि ओलीको व्यक्तिवादी शैलीकै कारण थियो । नेकपाको विघटनपश्चात ब्यूँतिएको एमालेमा ओलीको नेतृत्व शैलीकै कारण माधवकुमार नेतृत्व समूह एमालेबाट अलग भएको हो । सबैकुरामा सर्वाधिकार हुन खोज्ने ओली शैलीबाट समस्यामा परेको माधव समूहले विद्रोहभन्दा बाहेकको विकल्प देखेको थिएन । ओलीमा चरम व्यक्तिवादी सोंच र शैली यसअघिदेखि देखिन्छ । विरोधी र विपक्षीलाई उनले जहिले पनि किनारा लगाउने काम गरेका छन् । आफुँ अनुकुलका विधि तथा विधानको व्यवस्था गर्न माहिर ओलीलाई बन्द सत्रको पछिल्लो निर्णयले थप सहयोग गरेको छ । तर, यो निर्णयले एमालेलाई लोकतान्त्रिक अभ्यासतर्फ लैजान असहयोग गर्ने देखिन्छ । पछिल्लो निर्णयले ओलीलाई थप निरंकुश र स्वच्छेचारी बनाउन मद्दत गर्ने पक्का छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies