दक्षिण अफ्रिकामा पहिलो पटक भेटिएको कोरोना भाइरसको नयाँ भेरियन्ट तीव्र गतिमा विश्वभर फैलिदै गएको छ । ओमिक्रोन भनिएको यो भेरियन्ट एक सातामै २४ मुलुकमा देखिएको हो । विश्व स्वास्थ्य संगठन (डब्लुएचओ) ले नयाँ भेरियन्ट बी.१.१.५२९ लाई भेरियन्ट अफ कन्सर्नमा राखिएको छ । अनुसन्धानकर्ताहरुले ५० वटा म्युटेसन देखिएकाले यस अगाडि देखिएको भन्दा यो भेरियन्ट घातक हुनसक्ने जनाएका छन् । पहिलो र दोस्रो लहरको संक्रमणपछि बनेको खोप नयाँ भेरियन्टका लागि कति प्रभावकारी हुन सक्छ भन्ने पनि अनुसन्धान भइरहेको छ । अर्थात् कोरोना संक्रमणबाट नागरिक जीवनरक्षाका निम्ति फेरि नयाँ चिन्ता र चासो थपिएको छ । त्यसका निम्ति विभिन्न देशका अनुसन्धानकर्ताहरु लागिपरेका छन् ।
नयाँ भेरियन्टको त्रास र चिन्ता नेपालमा पनि देखिनु स्वभाविक हो । यसअघि जस्तै छिमेकी मुलुक अथवा तेस्रो मुलुक भएर यो भेरियन्ट नेपालमा भित्रन सक्न भएकाले आवश्यक सतर्कता अपनाउन जनस्वास्थ्यविद्हरुले चेतावनी दिएका छन् । दोस्रो लहरको संक्रमण जस्तै क्षति पुग्न सक्ने खतरा औल्याउँदै उनीहरुले आवश्यक तयारीमा लाग्न पनि सुझाव दिएका छन् । पहिलो र दोस्रो लहरको संक्रमणको खतराबारे पनि जनस्वास्थ्यविद्हरुले चासो र चेतावनी दिएका थिए । तर त्यसबेला सरकार र सरोकारवालाहरुले आवश्यक सुझावलाई पनि त्रास फैलाउने काम भएको भनेर ग्रहण गरेनन् । पहिलो भन्दा दोस्रो लहरको संक्रमणबाट मुलुकले ठूलो क्षति बेहोर्नुपर्ने कारण पनि आवश्यक तयारी नहुनु नै थियो ।
यदि आवश्यक तयारी भएको थियो भने मानवीय क्षति न्यूनीकरणमा बल पुग्ने थियो । तर त्यसो नहुँदा पहिलो लहरबाट भन्दा दोस्रो लहरबाट धेरै नागरिकले संक्रमित भएर ज्यान गुमाए । पहिलो लहरको संक्रमणबाट तीन हजार हाराहारी नागरिकले ज्यान गुमाएकोमा दोस्रो लहरसम्म पुग्दा साढे एघार हजार बढीले ज्यान गुमाएका छन् । लामो समयको लकडाउन र निषेधाज्ञाका कारण मुलुकले आर्थिक, सामाजिक र सांस्कृतिक नोक्सानी बेहोर्नु परेको छ । शैक्षिक क्यालेण्डर प्रभावित बनेको छ भने मनोवैज्ञानिक असर उस्तै देखिएको छ । अहिले सरकारले अनुदानबाट प्राप्त र खरीद गरेर ल्याएको खोप करीब एक करोड नागरिकलाई दिएको जनाएको छ । तर नयाँ भेरियन्टको अनुसन्धान र खतराबारे प्रष्ट भइनसकेकाले रोकथामको आवश्यक प्रबन्ध गर्न जरुरी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies