नेपालगञ्ज : “स्तनपानमा समानता, सबैको सहयोग र सहभागिता” भन्ने नाराका साथ नेपालमा पनि विभिन्न कार्यक्रम गरी सप्ताहव्यापीरुपमा विश्व स्तनपान दिवस मनाइँदैछ । विश्व स्तनपान दिवस हरेक वर्ष अगष्ट १ देखि ७ तारिखसम्म सप्ताहव्यापीरूपमा मनाइन्छ ।

सोही अवसरमा वेस्टर्न अस्पताल नेपालगञ्जले पनि स्तनपानको महत्व र यसले बालबालिकाको स्वास्थ्यमा पार्ने सकारात्मक प्रभावबारे जनचेतना फैलाउने उद्देश्यले एक कार्यक्रम आयोजना गरेको छ । कार्यक्रममा अस्पतालकी वरिष्ठ स्त्री तथा महिला रोग विशेषज्ञ डाक्टर कल्पना थापाले बालबालिकाको शारीरिक तथा मानसिक स्वास्थ्य र विकासका लागि स्तनपानको महत्वपूर्ण भूमिका रहने बताइन् । उनले स्तनपानले बच्चाहरूको शारीरिक तथा मानसिक विकासमा पुर्‍याउने फाइदाहरुका बारेमा प्रकाश पारिन् ।

वेस्टर्न अस्पताल नेपालगञ्जका सौगात विक्रम शाहका अनुसार कार्यक्रममा आहारविज्ञ सुशील खनालले आमाहरुलाई सुत्केरी अवस्थामा पोषण, खानाको तालिका, खानाका परिकारलगायत अन्य कुराबारे विशेष प्रस्तुति दिएका थिए ।

कार्यक्रममा सहभागी आमाहरुले स्तनपानबारे आफ्नो अनुभवहरू सुनाएका थिए भने स्तनपानका चुनौतीहरूबारे छलफल गरिएको थियो । कार्यक्रममा वेष्टर्न अस्पतालका स्वास्थ्यकर्मीहरूले स्तनपानसम्बन्धी सही तरिका र उपायहरका बारेमा चित्रहरु प्रदर्शन गरेका थिए । 

कार्यक्रमले आमाहरूलाई स्तनपानसम्बन्धी आवश्यक जानकारी र सहयोग प्रदान गर्न सफल भएको सहभागीहरुले बताएका छन् । अस्पतालले यस्ता कार्यक्रमहरू भविष्यमा पनि निरन्तर आयोजना गर्ने प्रतिबद्धता जनाएको छ ।

विश्व स्तनपान सप्ताह सन् १९९२ देखि मनाउन शुरु गरिएको हो । स्तनपानलाई शिशुको सबैभन्दा पुरानो र पहिलो खोप समेत भन्ने गरिन्छ । आमाको दुधमा रोग निरोधक तत्व हुने भएकाले नवजात शिशुको रोगसँग लड्न सक्ने क्षमता विकसित गर्न मद्दत पुग्ने स्वास्थ्य विज्ञहरु बताउँछन् । शिशुलाई जन्मेको एक घण्टामा स्तनपान गराउनुपर्छ । जन्मेको ६ महिनासम्म बच्चालाई स्तनपानमात्र गराउन डाक्टरहरुले सुझाव दिने गर्छन् ।

नेपाल सरकारले शिशु तथा बालबालिकाको खाद्य पदार्थको अनुचित प्रवर्द्धनको अन्त्य गर्न विश्व समुदायमा प्रतिबद्धता जनाएको छ । स्वास्थ्य तथा जनसंख्या मन्त्रालयले आमाको दुधलाई प्रतिस्थापन गर्ने वस्तु बिक्री वितरण नियन्त्रण गर्ने र सार्वजनिकस्थल तथा स्वास्थ्य संस्थाहरुमा स्तनपान कक्ष स्थापनाका लागि काम गर्दै आएको छ ।