काठमाडौँ : नेपाली कांग्रेस प्रतिनिधि सभा संसदीय दलका नेता भीष्मराज आङ्देम्बेले स्पष्ट नीति भए पनि त्यसलाई व्यवहारमा उतार्न नसके राजनीतिक नेतृत्व प्रभावकारी बन्न नसक्ने बताएका छन् ।

काठमाडौँमा आयोजित पुस्तक विमोचन कार्यक्रममा बोल्दै आङ्देम्बेले बदलिँदो राजनीतिक परिवेशअनुसार पार्टीको कार्यशैली र नेतृत्व क्षमतामा सुधार आवश्यक रहेको धारणा राखेका हुन् ।

कांग्रेस महामन्त्री गुरु घिमिरेद्वारा लिखित ‘बुद्ध, बिपी र आजका नेता र लिलिपुटका लघुमानव’ पुस्तक सार्वजनिक कार्यक्रममा उनले काँग्रेस वैचारिक र नीतिगत रूपमा स्पष्ट पार्टी भए पनि समयको मागअनुसार व्यवहारिक नेतृत्व दिन चुनौती रहेको बताए ।

उनले मुलुक र नागरिकका समस्या समाधान गर्ने दिशामा राजनीतिक दलका नीति केन्द्रित हुनुपर्नेमा जोड दिए । उनका अनुसार जनताका अपेक्षा र समसामयिक आवश्यकता सम्बोधन गर्न नीति मात्र नभई कार्यान्वयन गर्ने शैली र संगठनात्मक व्यवहार पनि प्रभावकारी हुनुपर्छ ।

आङ्देम्बेले पार्टीलाई नयाँ परिस्थितिअनुसार अघि बढाउन नेतृत्व र कार्यकर्ताबीच विश्वासको वातावरण निर्माण गर्नुपर्ने बताए । समयको परिवर्तन र नागरिकको चाहनालाई बुझेर पार्टीले आफ्नो प्रस्तुति र कार्यशैली सुधार गर्नुपर्ने उनको भनाइ थियो ।

उनले पछिल्लो राजनीतिक अवस्थाप्रति टिप्पणी गर्दै तत्कालीन लाभ र उपभोगलाई प्राथमिकता दिने प्रवृत्तिले दीर्घकालीन समाधान कमजोर बनाउने अवस्था देखिएको बताए । देशको राजनीति दीर्घकालीन योजना र जिम्मेवार सोचका आधारमा अघि बढ्नुपर्नेमा उनले जोड दिए ।