काठमाडौँ : वीरगञ्जस्थित नारायणी अस्पतालमा कार्यरत ६८ जना चिकित्सकले सामूहिक राजीनामा बुझाएका छन् । अस्पताल स्रोतका अनुसार कार्यरत चिकित्सकहरूले अस्पतालका मेडिकल सुपरिन्टेन्डेन्ट डा. चित्तरञ्जन साहसमक्ष राजीनामा पेस गरेका हुन् ।
गत साउन ८ गते अस्पताल परिसरमै कार्यरत चिकित्सक डा. प्रमोद राममाथि कुटपिट भएको तथा अन्य स्वास्थ्यकर्मीमाथि समेत आक्रमण र अस्पतालमा तोडफोड भएको घटनापछि चिकित्सकहरू आन्दोलित हुँदै आएका छन् ।
उक्त घटनामा घाइते भएका डा. रामको काठमाडौँस्थित राष्ट्रिय ट्रमा सेन्टरमा उपचार भइरहेको जनाइएको छ ।
घटनापछि चिकित्सकहरूले स्वास्थ्यकर्मीको सुरक्षा सुनिश्चित गर्न माग गर्दै आकस्मिक सेवाबाहेकका अन्य स्वास्थ्य सेवा बन्द गरेर आन्दोलन जारी राखेका छन् । सुरक्षा अवस्था सुधार र दोषीमाथि कारबाहीको माग गर्दै आन्दोलनमा उत्रिएका चिकित्सकहरूले पछिल्लो कदमका रूपमा सामूहिक राजीनामा दिएका हुन् ।
.jpg)
