काठमाडौँ : नेकपा (एमाले) ले आन्दोलनरत चिकित्सक तथा स्वास्थ्यकर्मीका माग सम्बोधन गर्न सरकारलाई तत्काल संवादको पहल गर्न आग्रह गरेको छ ।
चिकित्सकहरूको आन्दोलनका कारण स्वास्थ्य सेवा प्रभावित भइरहेको अवस्थाप्रति ध्यानाकर्षण गराउँदै एमालेले सरकारको भूमिका प्रभावकारी नभएको टिप्पणी गरेको हो ।
एमालेले सार्वजनिक गरेको विज्ञप्तिमा स्वास्थ्य क्षेत्रजस्तो संवेदनशील विषयमा देखिएको असहज परिस्थितिलाई गम्भीरतापूर्वक लिनुपर्ने उल्लेख गर्दै सरकारलाई जिम्मेवार ढंगले अघि बढ्न आग्रह गरिएको छ ।
पार्टीले चिकित्सक तथा स्वास्थ्यकर्मीको पेशागत अधिकार र कार्यस्थल सुरक्षाको सुनिश्चितता गर्नुपर्ने माग राखेको छ । स्वास्थ्य सेवा नियमित बनाउन तथा समस्या समाधानका लागि आन्दोलनरत पक्षसँग वार्ता र सहमतिका माध्यमबाट अघि बढ्नुपर्ने एमालेको सुझाव छ ।
एमालेले नागरिकको स्वास्थ्यसँग प्रत्यक्ष जोडिएको विषयमा दीर्घकालीन समाधान खोज्न सरकार, स्वास्थ्यकर्मी र सम्बन्धित पक्षबीच समन्वय आवश्यक रहेको जनाएको छ ।
.jpg)
