तिलु शर्मा पौडेल/मध्यान्ह
दोहा, कतार : जापान कतारमा जारी फिफा विश्वकप फुटबलको नकआउट चरणमा प्रवेश गरेको छ । खलिफा अन्तर्राष्ट्रिय स्टेडियममा शुक्रवार बिहान भएको खेलमा स्पेनलाई २-१ गोल अन्तरले हराउँदै जापानले राउन्ड अफ १६ मा स्थान बनाएको हो ।
खेलको ११ औँ मिनेटमा मोराटाले गोल गर्दै स्पेनलाई सुरुआती अग्रता दिलाएका थिए । खेलको दोस्रो हाफमा निकै सनसनी खेल खेलेको जापानको जितमा रित्सु डोन र एओ टानकाले एक एक गोल गरे । जितसँगै जापान समूह 'ई' को समूह विजेता बन्दै नकआउट चरणमा पुगेको हो ।जापानले ३ खेलमा ६ अङ्क जोड्यो ।पराजित स्पेनले ३ खेलमा ४ अङ्क जोड्यो । स्पेन पनि समूह उपविजेता बन्दै नकआउट चरणमा प्रवेश गरेको छ ।
शुक्रबार बिहानै भएको अर्को खेलमा जर्मनीले कोस्टाकारिकालाई पराजित गर्यो । अल बायत स्टेडियममा भएको खेलमा कोस्टारिकालाई ४-२ गोल अन्तरले पराजित गरे पनि जर्मनी प्रतियोगिताबाट बाहिरियो ।
निकै रोमाञ्चक खेलको १० औँ मिनेटमासेर्जी जिनाब्रीले गोल गर्दै जर्मनीलाई शुरुवाती अग्रता दिलाएका थिए तर, ५८ औँ मिनेटमा येल्त्सिन तेजेडाले गोल गर्दै कोस्टारिकालाई १-१ गोलको बराबरीमा ल्याए । ७० औँ मिनेटमा जुआन पात्लो भेर्गासले गोल गर्दै कोस्टारिकालाई २-१ को अग्रता दिलाए ।
खेलको ७३ औँ मिनेटमा सब्सिच्युड खेलाडीको रूपमा मैदान प्रवेश गरेका काइ हार्भट्जले गोल गर्दै जर्मनीलाई २-२ को बराबरीमा ल्याए । खेलको ८५ औँ मिनेटमा हार्भट्जले व्यक्तिगत दोस्रो गोल गर्दै जर्मनीलाई ३-२ को अग्रता दिलाए । त्यसपछि खेलको ८९ औँ मिनेटमा निकलस फुल्करुगले गोल गर्दै जर्मनीलाई ४-२ को जित दिलाए ।
जितका बाबजुद समूह 'ई' मा जर्मनी तेस्रो स्थानमा रहँदै प्रतियोगिताबाट बाहिरिएको छ। जर्मनी लगातार दोस्रो पटक समूह चरणबाट बाहिरिएको हो । जर्मनीले ३ खेलमा ४ अङ्क जोड्यो । यस समूहमा स्पेन ४ अङ्क जोडे पनि गोल अन्तरमा अघि रहँदै दोस्रो स्थानमा रहेर नकआउट चरणमा पुगेको छ । कोस्टारिका ३ अङ्क जोडेर पुछारमा रहँदै प्रतियोगिताबाट बाहिरिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies