– त्रिपुरा खरेल
म निलो शून्य आकाश बाहिर
काला सेता बादलभित्र
प्रकृतिका भिन्न आकृतिहरु
अवलोकन गर्दै रसपान गर्छु
बादलका कोरिएका रेखाहरु
चित्रकार पाब्लो पिकासो र
चित्रकार लैनसिंंह बाङ्देलका
प्रेरणाका स्रोत हुन् भन्ने लाग्छ ।।
बादलले कोरिएका चित्रहरूमा
कुनै नारी रोइरहेकी चित्र देख्छु
बादलका सेता थेग्लाहरू
तरुनीले ऐना हेर्दै गरेकी झैँ लाग्छ
आहा ! बादलको छटामा
कोरिएका चित्र रमाइरहेका देख्छु ।।
बादलको सेतो कालो रङ्गमा
दा विँचीको प्रेमको आँसुमा
मोनालिसाको मुस्कुराहट देख्छु
अर्को टुक्रा बादलको थेग्लामा
पाश्चात्य कलाभित्र रमाइरहेका
बाङ्देलका आधुनिक चित्रहरु देख्छु
बादलको परिवेशमा चित्रका थाक
कतै हात्ती घोडा कुदिरहेका छन्
सुन्दरीहरुलाई बुईमा चढाएर ।।
टाढा अग्ला पहाडका आकृतिहरु
बाद्ययन्त्र बोकेका गन्धर्वको गीतमा
अप्सराको नाच हेर्दै गरेका जस्ता
आकासरूपी क्यानभासमा
बनाइएका र पोखिएका चित्रहरु
पृथ्वीको आँखा र मनहरुले
सुटुक्क मनभरि कोरिदिन्छ
क्षणमा फुस्केर छरिएका बादल
आकृति बिनाको शून्य बनिदिन्छ
कुनै बिरहीको दुखेको मन जस्तै ।।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies