२०८१ चैत २४ गते आइतवार / Apr 06 , 2025 , Sunday
२०८१ चैत २४ गते आइतवार
Ads

गाउँमा दुध संकलन केन्द्र स्थापना भएपछि किसान हर्षित

draupadi film
सुर्य प्रसाद भुसाल
२०८१ जेठ ३१ गते १६:२६
गाउँमा दुध संकलन केन्द्र स्थापना भएपछि किसान हर्षित

अर्घाखाँची : भेटेरेनरी अस्पताल तथा पशु सेवा विज्ञ केन्द्र अर्घाखाँचीले सन्धिखर्क नगरपालिका वडा नम्बर ८ र भूमिकास्थान नगरपालिकाको वडा नम्बर ८ का किसानलाई लक्षित गर्दै सन्धिखर्क-८ किमडाँडामा भकारो सुधार र दुध संकलन केन्द्र स्थापना गरेको छ ।

कार्यालययले व्यावसायिकरुपमा गाई पालन गर्ने २५ जना किसानलाई कूल ३७ लाख ५० हजार लागतमा भकारो सुधार, दुध संकलन केन्द्र र पिसाव संकलन केन्द्र स्थापना गरेको कार्यालय प्रमुख विष्णु प्रसाद पौडेलले जानकारी दिए । भेटेरेनरी अस्पतालको ७५ प्रतिशत र किसानको २५ प्रतिशत लागतमा केन्द्र निर्माण गरिएको हो । गाउँमै दुध संकलन केन्द्र स्थापना भएपछि स्थानीय किसान हर्षित भएका छन् ।

संकलन केन्द्रमा अबदेखि दैनिक ५ सय लिटरभन्दा बढी दुध संकलन हुने उनले बताए ।‍ यस्तै बिहीबार नै ७५ प्रतिशत अनुदानमा किसानलाई ७५ वटा दुध संकलन गर्ने भाँडा र गाईका लागि म्याटसमेत हस्तान्तरण गरिएको कार्यालय प्रमुख पौडेलले बताए ।

सन्धिखर्क नगरपालिका वडा नम्बर ८ का वडा अध्यक्ष हुम प्रसाद बन्जाडेले जिल्लामै दुधको प्रमुख गन्तव्यमध्ये किमडाँडा एक भएकाले यसको शाख जोगाइराख्न किसानलाई आग्रह गरे । वडा कार्यालयले पनि आवश्यकअनुसारको सहयोग गर्ने उनले बताए ।

अर्घाखाँची दुग्ध व्यवसायी संघका जिल्ला अध्यक्ष चन्द्र प्रसाद बन्जाडेले हाललाई जिल्लामा दुधको बजारीकरणको समस्या नभएको बताए । अर्घाखाँचीमा उत्पादन भएको दुध अहिले प्यूठान, गुल्मीलगायतका जिल्लामा निर्यात हुने गरेको बताउँदै उनले कात्तिक महिनापछि भने दुधको बजारीकरणमा समस्या हुने बताए ।

सन्धिखर्क नगरपालिका वडा नम्बर ८ की वडा सदस्य लिला भुसाल, भेटेरेनरी अस्पताल तथा पशु सेवा विज्ञ केन्द्रकी पशु प्राविधिक राधा पन्थी, प्राविधिक योगेन्द्र प्रसाद मरासीनी, अर्घाखाँची दुग्ध व्यवसायी संघका सचिव काशी सापकोटालगायतले शुभकामना मन्तव्य राखेको कार्यक्रममा सन्धिखर्क नगरपालिका वडा नम्बर ८ का वडा सदस्य कृष्ण पराजुली, भेटेरेनरी अस्पताल तथा पशु सेवा विज्ञ केन्द्रका लेखापाल दुर्गा बहादुर विकलगायतको सभागिता रहेको थियो । कार्यक्रम पशु सेवा विज्ञ केन्द्रका अधिकृत सुन्दर विकले सञ्चालन गरेका थिए ।

ADV

सम्बन्धित खबर

Advertise