दोहा : नेपालीहरूका ठूला चाडपर्वहरू नजिकिएसँगै सहर र प्रवासबाट आफ्नो गृह जिल्ला भित्रने क्रम बाक्लिँदो छ । प्रवासमा रहँदा जिल्लाको समग्र हितका निमित्त खोलिएका थुप्रै अन्तर्राष्ट्रिय संघ संस्थाले यही बिदाको खास मौका पारेर आफ्ना महाधिवेशन तथा अधिवेशन गर्ने गरेका छन् ।
म्याग्दी जिल्लामा जन्मिएर नेपाल बाहिर रहेका प्रवासी म्याग्देलीहरुको साझा संस्था म्याग्दी प्रवासी नेपाली संघ(मोना),अन्तर्राष्ट्रिय कार्यकारी समितिले पनि आफ्नो नवौँ वार्षिक साधारण सभा म्याग्दीको मंगला गाउँपालिका–२,बाबियाचौरमा आयोजना गर्न लागेको छ । यही असोज १८ र १९ गते सम्पन्न हुने साधारण सभामा वडास्तरीय पञ्चेबाजा प्रतियोगिता समेत गरिने साधारण सभाका मूल संयोजक मिम पुर्जाले मध्यान्ह दैनिकलाई जानकारी दिए । साधारण सभाको उद्घाटन सत्रमा गाउँपालिकाको वडा कार्यालयले छनोट गरेका ५ समूहबीच प्रतिस्पर्धा हुनेछ ।
प्रतियोगितामा प्रथम, द्वितीय र तृतीय हुने समूहलाई क्रमशः ३५ हजार, २५ हजार र २० हजार नगदसहित प्रमाणपत्र प्राप्त गर्नेछन् भने अन्य दुई टिमले सहभागी प्रति समूह १० हजार र प्रमाणपत्र प्राप्त गर्ने मोना साधारण सभाका स्थानीय उपसमिति संयोजक याम थापाले जानकारी दिए ।
साधारण सभालाई सभ्य र भव्य बनाउन मंगला गाउँपालिकाभित्र तथा म्याग्दीका सामाजिक, राजनीतिकसहित सबै संघसंस्थाहरुलाई सबै किसिमका सहयोग गरिदिन मोना अन्तर्राष्ट्रिय समितिका अध्यक्ष ददिवल खडकाले अनुरोध गरेका छन् । साधारण सभाको खुल्ला सत्र इन्द्रेणी पार्क र बन्द सत्र मंगला शिक्षा क्याम्पसमा आयोजना गरिने छ ।
निःशुल्क आँखा शिविर शुरु
मोनाको साधारण सभाको अवसरका नेपाल नेत्रज्योती संघ, हिमालय आँखा अस्पताल पोखरासँगको सहकार्यमा निःशुल्क आँखा शिविर बुधबारदेखि शुरु भएको छ । १८ गतेसम्म सञ्चालन हुने शिविरको पहिलो दिन वृद्धवृद्धाको उत्साहजनक सहभागिता देखिएको थियो । शिविरमा आँखाका सबै किसिमका समस्याको परीक्षण तथा मोतिया बिन्दुको शल्यक्रिया, औषधी तथा चस्मा वितरण गरिने छ । शिविरमा हिमालयन आँखा अस्पताल पोखराकी चिकित्सक हरिमाया गुरुङको नेतृत्वमा चिकित्सकसहितको टोली खटिएको छ ।
शिविरको पहिलो दिन उत्साहजनक सहभागिता रहेको र शिविरमा आउने बालबालिकालाई आँखा जोगाउने टिप्ससहित समस्याको पहिचान गरी थप उपचारमा सघाइने शिविर संयोजक तथा मोना अन्तर्राष्ट्रिय कार्यकारी समितिका कोषाध्यक्ष नरेन्द्र फगामीले जानकारी दिए ।
शिविरको गाउँपालिकाकी उपाध्यक्ष प्रेमकुमारी क्षत्रीले उद्घाटन गदै आँखाको समस्या भएका बिरामीहरू धेरै भएपनि नियमित उपचार गर्न नसकेकाले जटिल समस्यापछि मात्रै सार्वजनिक हुने गरेकाले नियमित चेकजाँच गर्नुपर्नेमा जोड दिइन् । शिविरमा मंगला गापा–२ का वडा अध्यक्ष धनबहादुर खाती क्षति, नेपाल नेत्रज्योती संघ म्याग्दीका अध्यक्ष अमर बानियाँ र मोना अन्तर्राष्ट्रिय कार्यकारी समितिका अध्यक्ष ददीवल खड्कालगायतले सम्बोधन गरेका थिए ।
.jpg)
