लहान : सिरहाको धनगढीमाई नगरपालिका वडा नम्बर १० स्थित इन्द्रेणी पाठशालामा आज विधिवतरूपमा विद्यार्थीहरूबीच रंगोली प्रतियोगिता सम्पन्न भएको छ । उक्त प्रतियोगितामा विभिन्न कक्षाका विद्यार्थीहरूले सहभागिता जनाएउँदै सिर्जनात्मक ढंगले सुन्दर रंगोली बनाएका थिए ।

विद्यालयका शिक्षक सञ्जय चौधरीले प्रतियोगिताबारे बोल्दै हरेक कक्षामा बनेका रंगोलीहरू अवलोकन गरी उत्कृष्ट रंगोली बनाउने विद्यार्थीहरूलाई सम्मान गरिने जानकारी दिए । यो प्रतियोगिता विद्यार्थीहरूको सिर्जनात्मक क्षमताको अभिवृद्धिका साथै सांस्कृतिक चेतना बढाउन सहयोगी हुने विश्वास लिइएको छ ।

इन्द्रेणी पाठशाला धनगढीमाई नगरपालिका क्षेत्रका अभिभावकहरूको मन जित्न सफल शैक्षिक संस्था मानिन्छ । हरेक वर्ष यस प्रकारका प्रतियोगिताहरूको आयोजना गरी विद्यार्थीहरूलाई सिर्जनशीलता र प्रतिस्पर्धात्मक भावना विकास गराउने परम्परालाई विद्यालयले निरन्तरता दिँदै आएको छ ।

कार्यक्रमपछि विद्यार्थीहरू आफ्नो मिहिनेत र सिर्जनालाई शिक्षकहरूले मन पराएर प्रशंसा गर्दा निकै उत्साहित देखिएको प्रधानाध्यापक मुक्तिलाल सहनीले बताए ।