कुलमानको नयाँ कदम

काठमाडौं : विद्युत् नियमन आयोगले नेपाल विद्युत् प्राधिकरणलाई उद्योगको लाइन नकाटी बक्यौता उठाउन निर्देशन दिएपछि प्राधिकरणले नयाँ कदम चालेको छ । प्राधिकरणले डेडिकेटेड फिडर र ट्रंक लाइनको बक्यौता नतिर्ने उद्योगको बैंक खाता रोक्का, शेयर हस्तातरण, धितो बन्धकी दिन नपाउनेदेखि कम्पनीमा रहेको सर्वसाधारणको शेयर विक्रीसमेत रोक्न भन्दै नियामक निकायलाई पत्र पठाइएको छ ।

बुधबार नेपाल विद्युत् प्राधिकरणले नेपाल राष्ट्र बैंक, नेपाल धितोपत्र बोर्ड र कम्पनी रजिस्ट्रारको कार्यालयलाई पत्र पठाएर बक्यौता रकम उठाउन सहयोगको आग्रह गरेको हो । ३ निकायलाई पठाएको पत्रको जानकारी विद्युत् नियमन आयोगमा समेत गएको छ । डेडिकेटेड फिडर र ट्रंक लाइनको बक्यौता उठाउनका लागि प्राधिकरणले लाइन काट्नेबाहेक अन्य दबाबमूलक कारबाहीअन्तर्गत बैककै खाता रोक्क गर्ने विकल्पमा पुगेको हो ।

बुधबार प्राधिकरणले बैंकिङ र शेयर रोक्काको प्रत्रिया अगाडि बढाएको हो । ट्रंक लाइन तथा डेडिकेटेड फिडरबाट विद्युत् आपूर्ति लिई बक्यौता नतिर्ने उद्योगको खाताबाट रकम झिक्न नपाउनेगरी बैंक खाता रोक्का गर्नका लागि नेपाल राष्ट्र बैंकका गर्भनर महाप्रसाद अधिकारीलाई अनुरोध गरिएको छ । यस्तै, धितोपत्र बोर्डलाई समेत विद्युत् महसुल बक्यौता नतिरेका उद्योगको बक्यौता नतिरेसम्म उद्योगको शेयर सर्वसाधारणमा विक्री गर्न इजाजत दिने कार्य रोक्नसमेत आग्रह गर्दै पत्र लेखिएको छ ।

प्राधिकरणका कार्यकारी निर्देशक कुलमान घिसिङले उद्योगको शेयर, अन्य कुनै कम्पनीमा शेयरमा लगानी गरेको भए कम्पनीको शेयर एवं कम्पनीको संचालकको सम्बन्धित अन्य कम्पनीमा रहेको शेयरसमेत रोक्काको अनुरोधसहित कम्पनी रजिष्ट्रारको कार्यालयलाई पत्र पठाएका हुन् ।

बुधबारसम्म उद्योगीहरूबाट विद्युतको बक्यौता नतिरे लाइन काट्ने तयारीमा रहेका घिसिङले आयोगको पत्रपछि उद्योगको बैकिङ कारोबार रोक्ने रणनीति बनाएका हुन् । प्राधिकरणले सार्वजनिक गरेको बक्यौता रकम मध्ये सबैभन्दा बढी जगदम्बा स्टिलको रहेको छ । जगदम्बाले प्राधिकरणलाई १ अर्ब ६० करोड १८ लाख रकम तिर्न बाँकी छ । त्यस्तै, मारुती सिमेन्टले ५७ करोड ४४ लाख र अर्घाखाँची सिमेन्टले ४४ करोड ८४ लाख महसुल तिर्न पर्ने देखिन्छ । यस्तै, रिलायन्स स्पिनिङ मिल्सको ७५ करोड ३६ लाख तिर्न बाँकी छ । ३४ वटा उद्योगको २०७२ माघदेखि २०७५ वैशाखसम्मको बक्यौता बाँकी रहेका उद्योगहरूको विवरणसहित पत्राचार गरेको हो । उद्योगले प्राधिकरणलाई ६ अर्ब ४० करोड ९२ लाख ४० हजार ७०१ रुपैयाँ तिर्न बाँकी रहेको प्राधिकरणले जनाएको छ ।

कुन उद्योगले कति तिर्न बाँकी ?

संख्या उद्योगको नाम कति छ तिर्न ?
१) श्री बाबा जुट मिल २४,९२६,५४९

२) श्री रघुपति जुट मिल
८५,१४०,३७५

३) श्री रिलायन्स स्पिनिंग मिल्स
७५३,६८४,३३५

४) श्री निगाले सिमेन्ट प्रा.लि.
५८,११८,००८

५) श्री अरिहन्त मल्टिफाइबर लि.
११५,२९६,२७९

६) श्री अरिहन्त पोलिप्याक लि.
६६,२४७,०५०

७) मारुती सिमेन्ट प्रा.लि.
५७४,४७९,४९३

८) त्रिवेणी सिन्थेटिक याने इन्डस्ट्रिज प्रा.लि.
४३,९८३,१७९

९) हिमाल आइरन एन्ड स्टील
१३६,५०१,९०२

१०) त्रिवेणी स्पिनिंग
मिल्स
३२०,९८६,७९३

११) जगदम्बा स्टील प्रा.लि.
१,६०१,८४३,१२५