रोल्पा : सन स्टार क्लब रोल्पाले राष्ट्रिय पुरुष भलिबल प्रतियोगिता सञ्चालन गर्ने भएको छ । “रोल्पाको पर्यटन तथा खेलकुद विकासका लागि” भन्ने मूल नाराका साथ आगामी फागुन २ देखि ८ गतेसम्म राष्ट्रिय पुरुष भलिबल प्रतियोगिता सञ्चालन गर्न लागेको क्लबका अध्यक्ष पूर्ण केसीले जानकारी दिए ।
जिल्ला सदरमुकाम लिवाङ टुँडिखेलमा सञ्चालन हुने प्रतियोगिताले खेलकुद र पर्यटन विकासका लागि महत्वपूर्ण भूमिका खेल्ने अपेक्षा लिइएको अध्यक्ष केसीले बताए । क्लबको १३औं वार्षिकोत्सवको अवसरमा प्रतियोगिता आयोजना गर्न लागिएको हो ।
प्रतियोगितामा तीन विभागीय टिम र सात वटा प्रदेशस्तरका टिमको उपस्थिति रहनेछ । नेपाली सेना, सशस्त्र प्रहरी र नेपाल प्रहरी टिमसहित १० टिम भिड्ने अध्यक्ष केसीले बताए । राष्ट्रिय पुरुष भलिबल प्रतियोगिता प्रथम स्थान आउने टिमले नगद पुरस्कार ५ लाख रुपैयाँसहित ट्रफी, मेडल र प्रमाणपत्र प्राप्त गर्नेछन् ।
द्वितीय स्थान आउने टिमले नगद पुरस्कार २ लाख ५० हजार रुपैयाँसहित मेडल र प्रमाणपत्र प्राप्त गर्नेछन् । तृतीय स्थान आउने टिमले नगद पुरस्कार १ लाखसहित मेडल र प्रमाणपत्र प्राप्त गर्नेछन् । सान्त्वना स्थान आउने टिमले नगद पुरस्कार ५० हजार रुपैयाँसहित मेडल र प्रमाणपत्र प्राप्त गर्नेछन् ।
जिल्लास्तरीय खुला महिला भलिबल प्रतियोगितामा प्रथम स्थान आउने टिमले नगद पुरस्कार ५५ हजार रुपैयाँसहित ट्रफी, मेडल र प्रमाणपत्र प्राप्त गर्नेछन् । द्वितीय स्थान आउने टिमले नगद पुरस्कार ३५ हजारसहित मेडल र प्रमाणपत्र प्राप्त गर्नेछन् । तृतीय स्थान आउने टिमले १५ हजार रुपैयाँसहित मेडल र प्रमाणपत्र प्राप्त गर्नेछन् । सान्त्वना स्थान आउने टिमले नगद पुरस्कार १० हजार रुपैयाँसहित मेडल र प्रमाणपत्र प्राप्त गर्ने आयोजकले जानकारी दिएको छ ।
