दाङ : घोराही उपमहानगरपालिकाको १६औं नगरसभा सोमबारबाट सुरु भएको छ । सभामा नगरप्रमुख नरुलाल चौधरीले विभिन्न प्रस्ताव पेश गरेका छन् ।
नगरप्रमुख चौधरीले आर्थिक वर्ष २०८१/०८२ का लागि स्वीकृत केही योजना तथा कार्यक्रम संशोधन र रकमान्तर गर्ने प्रस्ताव गरेका छन् । त्यसैगरी अटोरिक्सा सञ्चालन तथा व्यवस्थापन सम्बन्धी कानुन २०८१, प्लास्टिक जन्य वस्तु प्रतिबन्ध विधेयक २०८१, दिशाजनले लेदो व्यवस्थापन सम्बन्धी नीति २०८१, आर्थिक ऐन २०८१ संशोधन प्रस्ताव पेश गरिएको छ ।
घोराही उपमहानगरपालिकाको आर्थिक ऐन २०८१ संशोधनको लागि निर्णयको आधारमा ग्रेडर भाडा दर, रोलर भाडा दर संशोधित गर्नुपर्ने प्रस्ताव गरिएको छ ।
त्यसैगरी नक्सा पास गर्ने कार्यलाई प्रोत्साहित गर्न घर मूल्यांकन गर्दा नक्सा पास प्रमाणपत्र वा घर अभिलेखीकरण प्रमाणपत्र तथा प्राविधिकको स्थलगत प्रतिवेदनलाई आधार मानिने, नक्सा पास वा अभिलेखीकरण नभएको हकमा अभिलेखीकरण गरेर मात्र घरको मूल्यांकन गरिने प्रस्ताव गरिएको छ ।
नगरसभाले शैक्षिक सरुवा शुल्क दस्तुर, सहकारी संस्थाहरूको व्यवसाय कर लिँदा घोराही क्षेत्रमा सञ्चालनमा आएको नीति वा आर्थिक वर्ष २०७५–७६ लाई आधार मान्ने, नक्सा पास तथा घर अभिलेखीकरण दस्तुर अन्तर्गत हाइवे सडक घोराई तुलसीर(स)र हाइवे सडक घोराही तुलसीपुर(ख)को दर रेट फरक–फरक भएको तर परिभाषा नगरिने, जग्गा विकास कार्यक्रम तथा प्लट मिलानसेवा शुल्क सहरी क्षेत्र र ग्रामीण क्षेत्रको बारेमा प्रस्ताव गरिएको छ ।
सभामा घोराही उपमहानगरपालिकाका प्रमुख प्रशासकीय अधिकृत एवं सभाका सदस्य सचिव ऋषिराम केसीले चालु आर्थिक वर्षको हालसम्मको प्रगति विवरण प्रस्तुत गरेका थिए ।
यस्तै नगरसभामा महालेखा परीक्षकको कार्यालयले औंल्याएको बेरुजुको विषयमा फछ्र्योटको प्रकृयालाई अघि बढाउने प्रस्ताव पेश गरिएको छ । नगरसभाको दोस्रो बैठक यही पुस १७ गते बस्ने गरी स्थगित भएको छ ।
