अर्घाखाँची : नेपाली कांग्रेसका केन्द्रीय सदस्य तथा बर्दिया क्षेत्र नम्बर १ का प्रतिनिधि सभा सदस्य संजय कुमार गौतमले आगामी चुनावमा नेपाली कांग्रेसले कुनै पनि दलसँग गठबन्धन नगर्ने बताएका छन् ।
कांग्रेसका कार्यकर्ताले अन्य दलको चुनाव चिन्हमा मतदान गर्न नपर्ने गरी कांग्रेसको संगठनलाई बलियो शक्तिशाली बनाउन कार्यकर्ताहरु लाग्नुपर्ने उनले बताए ।
कांग्रेस अर्घाखाँचीले सञ्चालन गरेको एकसय दिने अभियान अन्तर्गत सन्धिखर्क नगरसमितिले सन्धिखर्कमा आयोजना गरेको अन्तरक्रिया कार्यक्रमलाई सम्बोधन गर्दै कांग्रेस केन्द्रीय सदस्य एवं पूर्वमन्त्री गौतमले गठबन्धनको गर्ने कुरा संविधान संशोधनबाट हटाउनुपर्ने बताए ।
चुनावअघि साना–ठूला कुनै पनि दलले गठबन्धन गर्न नपाउने गरी संविधान संशोधन गर्नुपर्ने बताउँदै उनले दलहरु एक्ला एक्लै चुनाव लड्दा कांग्रेस, एमाले, माओवादी कोही पनि डराउनु नपर्ने दाबी गरे ।
गठबन्धनका कारण कांग्रेस कार्यकर्ताको अस्तित्व नै समाप्त हुने बताउँदै गौतमले भने, ‘कांग्रेस बनाउने हो, बिगार्ने अधिकार कसैलाई पनि छैन । अब गठबन्धन गर्ने कुरा कार्यकर्तालाई स्वीकार्य छैन ।’ प्रधानमन्त्री केपी शर्मा ओली नेतृत्वको सरकारले पनि सन्तोषजनक काम गर्न नसकेको गौतमले आरोप समेत लगाए । कांग्रेसले समर्थन गरेको भएपनि आम नेपालीले आशा र भरोसा गर्ने गरी सरकारले काम गर्न नसकेको उनको भनाइ छ ।
गौतमले नेपाली कांग्रेस अहिले जुन रुपमा हुनुपर्ने हो, त्यो रुपमा नभएको भन्दै कांग्रेसको गाउँ–गाउँको अवस्था बुझ्नको निम्ती र संगठनात्मक सुधारको निम्ती सय दिने अभियानको टिओआर निर्माण गरेर अगाडि बढेको बताए ।
उनले कांग्रेस अलिकति चुके, खलबलिए, कमजोर भए, आफ्नो बाटो बिराए मुलुकको राष्ट्रियता र अस्मिता कहाँ पुग्छ भन्ने आँकलन गर्न नसकिने चेतावनी दिए ।
उनले सरकारमा एमाले कांग्रेससँगै भएपनि सबैभन्दा प्रतिस्पर्धी पार्टी नै एमाले रहेको बताए । उनले सरकारमासँगै भएपनि सबै कुरामा कांग्रेस चुप लागेर बस्न नहुने बताए ।
अनुत्पादक क्षेत्रमा लगानी बढेको, उत्पादनसँग युवा शक्ति जोड्न नसकिएको र रोजगारी सृजना गर्न नसक्दा देशको उर्जाशिल जनशक्ति विदेशीएको भन्दै अब राजनीतिक दलहरु गम्भीर हुनुपर्ने उनको भनाई छ । कार्यक्रममा नेपाली कांग्रेस लुम्बिनी प्रदेशका सहमहामन्त्री बिष्णु प्रसाद खनाल, मुस्कान नेपाली, कांग्रेसका युवा नेता जिल्ला सभापति केशब श्रेष्ठ, नेपाली कांग्रेसका पूर्व सभापति कमल प्रसाद भुसाल, लुम्बिनी प्रदेश सदस्य शान्ता भण्डारी र जिल्ला उपसभापति बिष्णु भुसाल लगायतको उपस्थित रहेको थियो ।
