रौतहट : जिल्लाको फतुवा विजयपुर नगरपालिकाको एक घरमा सुरुङ बनाएर चोरी भएको छ । जिल्लाको फतुवा विजयपुर नगरपालिका वडा नम्बर ६ पेटभर्वा निवासी अच्छेलाल साहको घरमा चोरी भएको हो ।
बुधबार राती करिब १२ बजे सुरुङ बनाई घरमा प्रवेश गरेर ५ वटा मोबाइल गरगहना र नगद २ लाख गरी करिब ५ लाख बराबरको चोरी भएको पीडित अच्छेलाल साहको भतिज राजकिशोर साहले बताए ।
घरमा चोरी भएपछि गाउँकै युवाहरूले चोरी भएको मोबाइलको लोकेसनको आधारमा खोजी गर्दै जाँदा फतुवा गाउँ मठको नजिक ४ जना चोर फेला पारेका थिए । उनीहरूको साथबाट चोरी भएका मोबाइल, गरगहना र पैसासहित इलाका प्रहरी कार्यालय विजयपुरमा बुझाइएको छ ।
समातिएका चारैजना चोर गाउँ-गाउँमा मागेर खाँदै हिड्ने गरेको स्थानीयले बताएका छन् । इलाका प्रहरी कार्यालय सन्तपुरको प्रहरीले गस्ती नगर्दा बारम्बार चोरी भइरहेको स्थानीयहरूले गुनासो गरेका छन् ।
केहीदिन अघि पेटभर्वा गाउँकै ४ वटा घरमा चोरी भएको थियो । पेटभर्वा गाउँमा बारम्बार चोरीको घटना हुँदा गाउँबासी अहिले त्रसित बनेका छन् ।
