X

दोहा कतार : सोनाम ल्होछार पर्व यस वर्ष पनि कतारमा भव्यरूपमा मनाइने भएको छ । नेपालीहरूका विभिन्न राष्ट्रिय पर्वहरूमध्ये विशेषगरी तामाङ समुदायको राष्ट्रिय पर्वका रूपमा रहेको मञ्जुश्री संवत् २८६१ ( डुल ल्हो/सा पुख्री ) सर्प वर्ग सोनाम ल्होछार विविध सांस्कृतिक कार्यक्रम सहित मनाइने भएको हो ।

नेपाल तामाङ घेदुङ, प्रवास कार्यसमिति कतारले आयोजनाको घोषणा गरेको ल्होछार सांस्कृतिक कार्यक्रममा प्रस्तुति दिन नेपालबाट सेलो गायक मदन घलान तामाङ, सेलो गायिका पूजा तामाङ र म्हेन्दोमाया गायक तथा संगीतकार शैलाप वाइबा तामाङ कतार आउन लागेको घेदुङले जनाएको छ । कार्यक्रमको तयारीलाई अन्तिम चरणमा पुर्‍याइएको र नेपालबाट मंगलबार राति साढे ९ बजेको नेपाल एयरलाइन्सको उडानमार्फत कलाकारहरूको आगमनसँगै तयारी पूरा हुने घेदुङका अध्यक्ष विकास स्याङ्तान तामाङले जानकारी दिए । उनले नेपालको राष्ट्रिय झन्डा बाहक नेपाल एयरलाइन्स कार्यक्रमको एयरलाइन्स पार्टनर रहेको बताए । 

घेदुङमा आबद्धसहित दर्जनौं कलाकारले सांगीतिक प्रस्तुति दिने कार्यक्रममा सांस्कृतिक झाँकी, तामाङ सेलो, ताम्बा नाच ,लामा नाच, म्हेन्दोमायालगायत विभिन्न नेपाली तथा तामाङ सांस्कृतिक प्रस्तुति रहने सांस्कृतिक संयोजक सुर्जे तामाङले जानकारी दिए । प्रत्येक वर्ष माघ शुक्ल प्रतिपदाका दिन तामाङ समुदायले सोनाम ल्होछार अर्थात् नयाँ वर्ष मनाउने गर्दछन् । मुसा, गाई, बाघ, खरायो (बिरालो), ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ । ल्होसारका १२ वटै वर्ष पशु पञ्छीको नामबाट गणना गरिएकाले प्रकृति पूजक मानिन्छन् ।

अबु हमुरस्थित आइडिएल इन्डिएन स्कुलमा मध्यान्ह १२:३० बजेदेखि हुने कार्यक्रममा सहभागी हुन इच्छुकहरूका लागि आयोजकले कतारका विभिन्न स्थलहरूबाट निःशुल्क यातायातको व्यवस्था गरेको छ । यातायातको रुट को जानकारीका लागि यातायात संयोजक शंकराम तामांगलाइ ५०८०४३०१ मा सम्पर्क गर्न अनुरोध गरेका छन् ।

कार्यक्रममा सहआयोजकका रूपमा नेपाल तामाङ ताम्बा घेदुङ, प्रवास कार्यसमिति,नेपाल तामाङ लामा घेदुङ, प्रवास कार्यसमिति, नेपाल तामाङ संस्कृति घेदुङ, प्रवास कार्यसमिति. नेपाल तामाङ महिला घेदुङ, प्रवास कार्यसमिति र नेपाल तामाङ युवा घेदुङ, प्रवास कार्यसमिति कतार रहेका छन् । मध्यान्ह राष्ट्रिय दैनिक उक्त कार्यक्रमको सञ्चार सहयोगीका रूपमा रहेको छ ।