नुवाकोट : नुवाकोटको तारकेश्वर गाउँपालिका-१, दान्सिङ छाप डाँडामा हिजो साँझ बसको ठक्करबाट एक महिलाको मृत्यु भएको छ ।
काठमाडौँबाट तारकेश्वरतर्फ आउँदै गरेको बा २ खा ६८०४ नम्बरको बसबाट ओर्लिने क्रममा दुर्घटना भएको हो । मृतक तारकेश्वर-१ की स्थायी बासिन्दा थिइन् । उनी आफ्ना आफन्तको क्रियाक्रम सकेर तारकेश्वर-५ निग्लेनीबाट घर फर्कँदै थिइन् ।
बसबाट ओर्लिने क्रममा सवारी अगाडि बढ्दा उनी चेपिएर गम्भीर घाइते भएकी थिइन् । स्थानीयले तत्कालै उद्धार गरी त्रिशूली अस्पताल पुर्याए पनि उपचारका क्रममा उनको मृत्यु भयो ।
स्थानीयवासीका अनुसार बस चालक यात्रुहरूमाथि रिसाउने, छिटो झार्न दबाब दिने तथा हतारिने बानी राख्दै आएका थिए । उनीहरूको लापरवाहीकै कारण आज एक निर्दोष महिलाले ज्यान गुमाउनु परेको स्थानीयबासीले बताएका छन् ।
हाल प्रहरीको नियन्त्रणमा रहेका चालक र बसबारे थप अनुसन्धान भइरहेको प्रहरीले जनाएको छ ।
