काठमाडौं :नेकपा (माओवादी केन्द्र) निकट पत्रकारहरूको संगठन प्रेस सेन्टर नेपाल पाँचौं महाधिवेशनमा छ ।
शनिबार सुरु महाधिवेशन आइतबारसम्म चल्ने कार्यतालिका छ । महाधिवेशनको उद्घाटन समारोहलाई सम्बोधन गर्दै शीर्ष नेताहरूले प्रेस सेन्टरको नयाँ नेतृत्व सहमतिमै चुन्न दबाब दिएका छन् ।
पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ले सहमतीमा नेतृत्व चयन होस् भन्ने आफ्नो चाहना रहेको बताए ।
‘सहमतिमा नेतृत्व चयन गर्नुहोस् भन्ने मेरो चाहना छ । लोकतान्त्रिक अभ्यास गर्न सकिन्छ । तर, सर्वसम्मत नेतृत्व चयन गर्ने कुरा अझ जनवादी हुन्छ’, प्रचण्डले भने । अर्थात्, प्रचण्डले सहमतिमै नयाँ नेतृत्व चयन गर्न भनेर दबाब दिएका हुन् ।
माओवादी केन्द्रका उपाध्यक्ष अग्नि सापकोटाले पनि प्रेस सेन्टरलाई सहमतिबाटै नयाँ नेतृत्व चयन गर्न भनेका छन् ।
‘लोकतन्त्रको सर्वोत्तम विधि नै सहमति हो । सहमति कायम गर्न सबैले आ–आफ्नो ठाउँमा भूमिका खेल्नुस् । यो अग्रगामी भूमिकामा छ । यसले राष्ट्रिय सन्देश दिन्छ भन्ने विश्वास छ’, सापकोटाले भने ।
महाधिवेशनमा देशभरबाट ८५० जना पत्रकारहरू प्रतिनिधिका रूपमा सहभागी छन् । महाधिवेशनले अध्यक्ष, वरिष्ठ उपाध्यक्ष, उपाध्यक्ष ५, महासचिव, उपमहासचिव ५, सचिव १५ र कोषाध्यक्षसहित ९९ सदस्यीय केन्द्रीय समिति निर्वाचित गर्ने छ ।
११९ सदस्यीय केन्द्रीय समितिमा ९९ जना प्रतिनिधिबाट चुनिने व्यवस्था विधानमा छ । २० प्रतिशत अध्यक्षको प्रस्तावमा केन्द्रीय समितिले मनोनयन गर्ने छ । २९ सदस्यीय पदाधिकारीमा अध्यक्ष १, वरिष्ठ उपाध्यक्ष १ जना रहने छन् । उपाध्यक्ष खुल्ला ३, महिला १, समावेशी १० जना हुने छन् ।
महासचिव १ जना हुने छन् । उपमहासचिव खुल्ला १, महिला १, दलित १, मधेशी १, आदिवासी÷जनजाति १० जना हुने छन् । सचिव खुल्ला २, महिला १, समावेशी १, प्रत्येक प्रदेशबाट १÷१ जना, कोषाध्यक्ष १ जना रहने व्यवस्था विधानमा छ ।
अध्यक्षमा आकांक्षीको लर्को
नेताहरूका अनुसार प्रेस सेन्टरको अध्यक्षमा आकांक्षीको लर्को छ । अध्यक्षका आकांक्षीहरूले पार्टी अध्यक्ष प्रचण्डलाई भेटेर आफ्नो चाहना सुनाएका छन् ।
गत बिहीबार र शुक्रबार प्रचण्ड निवास खुमलटारमा प्रेस सेन्टरका पदाधिकारीहरू पुगेका थिए । त्यसक्रममा आधा दर्जन बढीले भावी नेतृत्वका लागि आकांक्षा प्रकट गरेका हुन् ।
वर्तमान अध्यक्ष विष्णु सापकोटा ‘जुगल’ आफैं दोहोरिन चाहन्छन् । वर्तमान वरिष्ठ उपाध्यक्ष कमल गिरी, उपाध्यक्ष दीपेन्द्र रावल, निर्मल ज्ञवाली, लक्ष्मण खड्काले नेतृत्वका लागि लबिइङ बढाएका छन् ।
बबिन शर्मा, मनोज घर्तीमगर र सुरेश यादवले पनि नेतृत्वको आकांक्षा राखेका छन् । वर्तमान महासचिव सन्तोष पौडेलले पनि अध्यक्षमा दाबी गरेका छन् ।
नेताहरूका अनुसार वर्तमान अध्यक्ष सापकोटा नै दोहोरिने वा वरिष्ठ उपाध्यक्ष गिरीलाई अध्यक्ष बनाएर जाने भन्नेमा छलफल केन्द्रित छ । तेस्रो व्यक्तिलाई अध्यक्ष बनाउने विषय पनि बहसमा छ ।
तर, अध्यक्षका आकांक्षीको लर्को नै लागेकाले सहमतिको विकल्पभन्दा चुनाव उचित हुने रायसमेत प्रेस सेन्टरका नेताहरूले प्रस्तुत गरिरहेका छन् ।
पार्टी नेताहरूले सहमतिमै नेतृत्व चयन गर्न दबाब दिएकाले प्रेस सेन्टरका नेताहरू दबाबमा परेका छन् ।
.jpg)
.jpg)
