डोल्पा : त्रिपुरासुन्दरीका नगर प्रहरीले एक व्यापारीलाई कुटपिट गरेका छन् । आज बिहान नगरपालिकाको त्रिपुराकोट बगर बजार सरसफाइ गराउन निस्केका नगर प्रहरीले किराना पसल अघि फोहोर गरेको भन्दै नेपालगञ्जका ५५ वर्षीय कृष्णमुरारी वैश्यमाथि कुटपिट गरेका हुन् ।
नेपालगञ्जबाट व्यापार गर्न आएका उनलाई नगर प्रहरीले मुक्का हानेका थिए । प्रहरीको मुक्का प्रहारबाट उनको मुखमा चोट लागेर रगत बगेको छ ।
एकाबिहानै पसलअघि आएको नगर प्रहरीको टोलीले आफूलाई पसल अघिको मुख्य सडकमा पानी पोखेको भन्दै सुरुमा लछारपछार गरी मुक्का प्रहार गरेको उनले बताए ।उनले भने, 'त्यो पानी माथिबाटै चुहिएर आएको हो, पसल अघि फोहोर पनि थिएन, तैपनि एक्कासी आएर प्रहरीले कुटपिट गर्यो, बुहारी नपुगेको भए अझै कुटपिट गर्थ्यो, अब नगर प्रहरीको ज्यादतीविरुद्ध कानुनी उपचार खोज्छु ।'
आफूमाथि भएको कुटपिटको घटनालाई लिएर नजिकै रहेको प्रहरी चौकी त्रिपुराकोट जाँदा प्रहरीले नगरपालिकामै जानुस् भनेर फर्काएको उनको गुनासो छ ।
नगर प्रहरीका हवल्दार लोकबहादुर बुढाले पसलअघि भएको फोहोर सफा गर्नुस् भन्दा नमानेपछि घम्साघम्सी भएको नगर प्रहरीले बताएको छ ।
