रामेछाप : काठमाडौंको तीनकुनेमा राजावादीहरूले गरेको आन्दोलनमा आगो लगाएर हत्या गरिएका पत्रकार सुरेश रजकको परिवारलाई नेपाल पत्रकार महासंघ रामेछापले आर्थिक सहयोग गर्ने भएको छ । पत्रकार महासंघ रामेछाप शाखाले जिल्लामा क्रियाशील पत्रकारहरूबाट स्वेच्छिकरूपमा आर्थिक संकलन अभियानसमेत मंगलबारबाटै सुरु गरेको छ ।

मंगलबार महासंघ रामेछापले आयोजना गरेको अन्तरक्रिया कार्यक्रममा महासंघका पूर्व अध्यक्ष टीकाप्रसाद भट्टले रजकको परिवारलाई सान्त्वना दिन र ‘हामी साथमै छौं’ भन्ने आभास दिलाउन आर्थिक सहयोग जुटाएर प्रदान गर्ने कार्यक्रम उत्तम हुने बताए । 'हामीले सकेजति सहयोग गरौं, रजकको परिवारसम्म त्यो सहयोग पुर्‍याऔं, हामीले रजकको परिवारको भरोसा टुट्न दिनु हुँदैन,' भट्टले भने ।

एउटा पत्रकारको परिवारलाई पीडा पर्दा अर्को पत्रकारले सहयोग गर्ने राम्रो बानी बसाल्नसमेत यो अभियान सुरु गरिएको पत्रकार महासंघ रामेछापका अध्यक्ष दीपककुमार घिमिरेले बताए । उनले भने, 'हामीले सुरु गरेको यो अभियानले देश विदेशमा स्थान पाओस् ताकी पत्रकारितामा लाग्नेहरूले हाम्रो संस्थालाई अभिभावक सम्झन सकोस् ।'