काठमाडौं : काठमाडौंको तीनकुनेमा शुक्रबार भएको राजावादी प्रदर्शनका क्रममा ज्याउन गुमाउने २ जनाका परिवारलाई सरकारले १०÷१० लाख रुपैयाँ सहयोग दिने भएको छ ।

गृहमन्त्रिस्तरीय निर्णयले पत्रकार सुरेश रजक र कीर्तिपुरका सविन महर्जनको परिवारलाई आर्थिक सहयोग उपलब्ध गराउने निर्णय गरेको गृहमन्त्रीको सचिवालयले जनाएको छ ।

रिपोर्टिङका क्रममा तीनकुनेमा एक घरमा प्रदर्शनकारीले लगाएको आगोमा परेर सुरेशको मृत्यु भएको थियो । पोस्टमार्टम रिपोर्टमा जलेर मृत्यु भएको देखिएको छ ।

त्यस्तै काठमाडौं–हेटौंडा रुटमा सुमो गाडी चलाउने कीर्तिपुर–४ गाम्चाका २९ वर्षीय सविन महर्जनको प्रहरीको गोली लागेर मृत्यु भएको हो ।

मन्त्रालयका उपसचिव रविन्द्र आचार्यका अनुसार आर्थिक सहयोग उपलब्ध गराउने विषयमा अर्थ मन्त्रालयसँग समन्वय भइरहेको छ ।

‘मन्त्रीज्यूले अर्थ मन्त्रालयसँगको समन्वयपछि मृतक परिवारलाई १०–१० लाख क्षतिपूर्ति दिने निर्णय गर्नुभएको छ । मृतक परिवारबाट दाबी आएपछि उक्त रकम हस्तान्तरण गरिनेछ,’ सहसचिव आचार्यले भने ।
सरकारले यसअघि नै प्रदर्शनका क्रममा घाइते भएकाहरूको निःशुल्क उपचार गर्ने निर्णय गरेको छ ।