२०८१ चैत २१ गते बिहिवार / Apr 03 , 2025 , Thursday
२०८१ चैत २१ गते बिहिवार
Ads

विराटनगरमा इण्डो नेपाल टी–२० क्रिकेट हुने

draupadi film
अनिल श्रेष्ठ
२०८१ चैत २० गते २०:०८
विराटनगरमा इण्डो नेपाल टी–२० क्रिकेट हुने

विराटनगर : चौथो संस्करणको मिल्स कप इण्डो नेपाल टी–२० क्रिकेट प्रतियोगिता हुने भएको छ । आगामी चैत २३ गतेदेखि ३० गतेसम्म विराटनगर जुट मिल खेल मैदानमा उक्त प्रतियोगिता हुने भएको हो । 

क्रिकेट खेलको विकास र प्रवद्र्धनका लागि प्रत्येक वर्ष हुँदै आएको विराटनगरको प्रतिष्ठित प्रतियोगिताको तयारी अन्तिम चरणमा पुगेको आयोजकले बुधबार पत्रकार सम्मेलन गरी जानकारी गराएको छ । 

प्रतियोगितामा भारतका ६ र नेपालका ६ टिम गरी जम्मा  १२ टिमको सहभागिता रहेको क्लबकी सचिव शान्ता श्रेष्ठले जानकारी दिइन् । 

प्रतियोगितामा भारतको दिल्ली युथ क्लब, हाइपर फाँर्मेन्स क्रिकेट एकेडेमी पटना, प्रशान्त क्रिकेट क्लब जोगवनी, डिजायर क्रिकेट क्लब पूर्णिया, बिहार क्रिकेट क्लब र मुन क्रिकेट एकेडेमी फारबिजगन्चको टिम रहेको छ । स्वदेशका होराइजन क्रिकेट क्लब विराटनगर, सिरहा क्रिकेट क्लब, झापा जिल्ला क्रिकेट क्लब, आयोजक मिल्स क्रिकेट क्लब एन्ड एकेडमी, सिद्धार्थ स्पोर्टिङ क्लब (एनबीएससी) नेपाल र वाइआरसीसी विराटनगर रहेको छ ।

प्रतियोगिताको उद्घाटन खेल आउँदो शनिबार जोगवनीको प्रशान्त क्रिकेट क्लब र विराटनगरको होराइजन क्रिकेट क्लबबीच हुनेछ । प्रतियोगिता नकाउट आधरमा हुने आयोजकले बताएको छ । 

यस वर्षको प्रतियोगितामा विजेता टिमले २ लाख १ हजार नगद पुरस्कारसहित आकर्षक ट्रफी प्राप्त गर्नेछ, जुन गत वर्षको तुलनामा ५० हजार बढी हो । त्यसैगरी, उपविजेता टिमले १ लाख १ हजार नगद पुरस्कार प्राप्त गर्नेछ, जुन गत वर्षको भन्दा २६ हजार पुरस्कार राशी बढाएको क्बलकी सचिव श्रेष्ठले बताइन् । 

गत वर्ष विजेतालाई नगद १ लाख ५१ हजार रुपैयाँ र उपविजेतालाइ गत वर्ष ७५ हजार रुपैयाँ रहेको थियो । यसरी आयोजकले यस वर्ष प्रतियोगिताको गरिमा र प्रतिस्पर्धात्मकता बढाउन पुरस्कार राशिमा वृद्धि गरेको बताइएको छ । 

प्रतियोगिताको प्रत्येक खेलमा उत्कृष्ट प्रदर्शन गर्ने खेलाडीलाई ‘प्लेयर अफ द म्याच’ घोषणा गरी ३ हजार १ सय नगद पुरस्कारद्वारा सम्मानित गरिनेछ । त्यसैगरी, सम्पूर्ण प्रतियोगिताभर सर्वाधिक उत्कृष्ट प्रदर्शन गर्ने खेलाडीलाई ‘म्यान अफ द टुर्नामेन्ट’ घोषणा गरी २५ हजार नगद पुरस्कार प्रदान गरिनेछ । यसका साथै, प्रतियोगिताको सर्वाधिक रन बनाउने ‘बेस्ट ब्याटर’ र सर्वाधिक विकेट लिने ‘बेस्ट बलर’लाई जनही  १५ हजार नगद पुरस्कार प्रदान गरिनेछ । यी व्यक्तिगत पुरस्कारहरूले खेलाडीहरूको प्रतिभा र क्षमतालाई थप प्रोत्साहन गर्ने आयोजकको विश्वास छ ।

तेस्रो संस्करणको मिल्स कप इण्डो नेपाल टी–२० क्रिकेट प्रतियोगितामा विराटनगरको वाईआरसीसी क्रिकेट क्लबले उपाधि जितेको थियो । फाइनलमा उक्त टिमले विराटनगरकै होराइजन क्रिकेट क्लबलाई २०० रनको फराकिलो अन्तरले पराजित गरेको थियो । विगतका तीन संस्करणहरूमा देखिएको उत्साहजनक सहभागिता र प्रतिस्पर्धात्मक खेलहरूले यस प्रतियोगिताको लोकप्रियता र महत्व बढाउन सहयोग पुर्‍याएको मिल्स क्रिकेट क्लब एन्ड एकाडेमीका अध्यक्ष मुरली चौधरीले बताए ।

मिल्स कप इण्डो नेपाल टि–२० क्रिकेट प्रतियोगिताले नेपाल र भारतबीचको खेलकुद कूटनीतिलाई सुदृढ बनाउनुका साथै स्थानीय खेलाडीहरूलाई अन्तर्राष्ट्रिय स्तरको अनुभव हासिल गर्ने अवसर प्रदान गर्ने प्रतियोगिताको संयोजक तथा विराटनगर १६ का वडाअध्यक्ष उद्धव भुजेलले बताए । ‘यस प्रतियोगिताले नयाँ प्रतिभाहरूको पहिचान गर्न, खेलाडीहरूको क्षमता अभिवृद्धि गर्न र क्रिकेट खेलप्रति जनआकर्षण बढाउन महत्वपूर्ण भूमिका निर्वाह गर्दछ,’ वडाअध्यक्ष भुजेलले भने । 

पूर्वी नेपालमा क्रिकेट खेलको विकास र प्रवद्र्धनका लागि मिल्स क्रिकेट क्लब एण्ड एकाडेमीले निरन्तर प्रयास गरिरहेको छ । यस प्रतियोगिताले क्षेत्रीय स्तरमा क्रिकेट खेलको लोकप्रियता बढाउन, नयाँ प्रतिभाहरूलाई राष्ट्रिय तथा अन्तर्राष्ट्रिय मञ्चमा प्रस्तुत गर्न र क्रिकेट पूर्वाधारको विकासमा सहयोग पुर्‍याउने अपेक्षा गरिएको छ ।

ADV

सम्बन्धित खबर

Advertise