दोहा, कतार : गैरआवासीय नेपाली संघ, राष्ट्रिय समन्वय परिषद् (एनआरएनए एनसीसी) कतारले सम्मान तथा धन्यवाद कार्यक्रम सम्पन्न गरेको छ । इस्लाम धर्मालम्बीहरुको महान् पर्व इद उल फित्र, नेपाली नयाँ वर्ष २०८२, यक्वा तङनाम, साकेला उँभौली र नेपाल डे को अवसरमा शुभकामना आदान प्रदानसहित एनसीसी कतारको २०२३–२०२५ कार्यकालको विभिन्न कार्यक्रमहरूमा सहयोग गरेका सहयोगी, संघसंस्था र कलाकारहरूलाई सम्मान तथा धन्यवाद कार्यक्रम सम्पन्न गरेको हो । 

सनैयामा अवस्थित फूलबारी रेस्टुरेन्टमा मंगलबार एनसीसी कतारका अध्यक्ष रमेश भट्टको सभाध्यक्षता तथा कतारका लागि नेपाली राजदूत रमेशचन्द्र पौडेलको प्रमुख आतिथ्यतामा सम्पन्न कार्यक्रममा बोल्दै प्रमुख अतिथि पौडेलले नेपाली कल्चरल हाउस स्थापनाका लागि दूतावासले पहल गर्ने बताए । पौडेलले एनसीसीमार्फत प्राप्त सुझावलाई मनन गर्दै दूतावासले समन्वय गरेर कूटनीतिक तवरले पहल गर्ने बताए । 

आफूले पाएको जिम्मेवारी र प्रतिबद्धतालाई क्रमशः पूरा गर्दै जाने क्रममा सबैबाट राम्रो साथ सहयोग पाएको बताउँदै एनसीसीका संघसंस्था संयोजक केशव कार्कीले कतारमा रहेका संघसंस्थाप्रति कृतज्ञता जाहेर गरे ।

त्यस्तै एनसीसीका सांस्कृतिक विभाग संयोजक विवेक पुलामी मगरले कतारमा रहेका सबै कलाकारलाई समेट्दै अगाडि बढ्ने आफूले प्रयास गरिरहँदा कलाकार, कोरीयोग्राफर तथा संघसंस्थाहरुलाई धन्यवाद ज्ञापन गरे ।

कतारका लागी नेपाल सरकारका पर्यटनदूत राजेन्द्रकुमार शर्मा, एनआरएनएका संस्थापक उपाध्यक्ष सागर नेपाललगायतले एनसीसी कतारले गरेका कार्यसम्पादनको प्रशंसा गरे । कार्यक्रममा कतारमा स्थापित वैचारिक, सामाजिक, व्यावसायिक, सामुदायिक, साहित्यिक संघ संस्थाहरूको प्रमुख तथा प्रतिनिधिसहित अन्य व्यक्तित्वहरूको उल्लेखनीय उपस्थिति रहेको थियो । कार्यक्रमलाई महासचिव रबिन मगरले सहजीकरण गरेका थिए भने प्रथम उपाध्यक्ष कृष्ण पन्थीले स्वागत मन्तव्य राखेका थिए । 

कार्यक्रमको समापन गर्दै सभाध्यक्ष भट्टले कतारमा रहेका नेपालीहरूले सामाजिक सञ्जालमा लेखेका शब्दहरू, संघसंस्थाहरूको ब्यानरमा कतारको झण्डाको प्रयोगप्रति कतार सरकारको गम्भीर ध्यानाकर्षण भएको बताए । भट्टले कतारमा नेपालीले राजनीतिको नामबाट हुने गतिविधिप्रति सजग रहन सुझावसहित कतारको राष्ट्रिय गान पनि नेपालीहरूका कार्यक्रममा नबजाउन सुझावात्मक अनुरोध गरे ।