इटहरी : इटहरीमा एक महिलाले खरिद गरेको निजी जग्गामा नाला र पैनी देखाएर वडा कार्यालयले सर्जमिन गरी न्यायिक समितिलाई पठाएपछि विवाद भएको छ ।
इटहरी उपमहानगर ४ जागृती टोल निवासी लक्ष्मी अधिकारीले खरिद गरेको निजी जग्गामा सम्बन्धित वडा कार्यालयले नाला र पैनी देखाइ झुटो सर्जमिन मुचुल्का बनाएर न्यायिक समितिलाई पठाएपछि अहिले विवाद भएको हो । नक्सामै नभएको नाला र पैनी कागजमा देखाएर सर्जमिन गरेपछि इटहरीकी लक्ष्मी अधिकारी आफ्नो निजी जग्गा संरक्षणका लागि पत्रकार र न्यायिक समितिसँग हार गुहार मागेकी छिन् । इटहरी उपमहानगर ४ जागृती टोलकी अधिकारी अहिले आफ्नो जग्गा जोगाउन सञ्चार गृह हुँदै अदालत जाने तयारी थालेकी छिन् । उपमहानगरको न्यायिक समितिबाट न्याय नपाएपछि उनी अदालत जाने तयारी गरेको बताउँछिन् ।
नम्बरी जग्गामा जबरजस्ती पैनी र नाला देखाएर वडा कार्यालयबाट सर्जिमन गरेपछि शुक्रबार उपमहानगरको न्यायिक समितिले तीनै महिलाको विपक्षमा फैसला गरेको थियो । लक्ष्मीले २०६५ सालमा स्थानीय छिमेकीबाट इटहरी ४ जागृती टोलमा साढे १३ धुर जग्गा किनेको बताइन् । पटक–पटक अमिनले नापजाँच गर्दा र नापी शाखाबाट जारी भएको नक्सामा पनि नाला र पैनी नभेटिएको अवस्थामा वडा कार्यालयले झुटो सर्जमिन बनाएर आफुलाइ अन्याय गरेको उनले आरोप लगाइन् । उनले न्याय पाउने आशमा विगत ५ महिनादेखि उपमहानगरको न्यायिक समिति धाएको तर उपमेयर संगीता कुमारी चौधरीको एकलौटी निर्णयले अन्याय भएको बताउँदै अदालत जाने बताइन् ।
अधिकारीले खरिद गरेको जग्गाको विषयलाई लिएर स्थानीय शेषराज खतिवडासहित २४ जनाले ५ महिना अघि न्यायिक समितिमा उजुरी गरेका थिए । अधिकारिले जग्गा खरिदसँगै भौतिक संरचना निर्माण गर्दा पैनी थुनेको दावीसहित भोगचलनमा बाधा पुग्ने गरी खतिवडासहित २४ जनाले ८१ मंसिर १७ गते न्यायिक समितिमा उजुरी दिएका थिए । उजुरी पश्चात समितिले सम्बन्धित वडा कार्यालयलाई सो जग्गाको विषयमा सर्जमिन मुचुल्का तयार पारी न्यायिक समितिमा बुझाउन अनुरोध बमोजिम ४ नं वडा कार्यालयले जग्गा धनीलाई थाहा नै नदिइ सर्जमिन मुचुल्का बनाएर पठाएको पीडित महिलाको भनाइ छ ।
सर्जमिन मुचुल्का उठाउँदा आफुलाई थाहा नै नदिइ मनोमानी ढंगले बनाएको पीडित जग्गा धनी अधिकारीले बताइन् । कागजमा उल्लेख भए बमोजिम सो जग्गामा कुनै नाला तथा पैनी पनि नरहको उनले दाबी गरिन् ।
उजुरी गर्ने खतिवडा आफ्नो छिमेकी पनि नरहेको उनले बताइन् । आसपासका छिमेकीहरूलाई यस जग्गाले अहिलेसम्म कुनै असर नै नगरेको बताउँदै बर्खाको बेला आउने भेल सिधैँ आफ्नो जग्गाबाट कटाएर ड्रेनमा हाल्ने योजना अनुसार शेषराजले षड्यन्त्र रचेको उनले आरोप लगाइन् ।
यता सर्जमिन मुचुल्का बनाउने इटहरी उपमहानगर वडा नं ४ का वडाध्यक्ष भक्त लामाले जग्गाको विषयमा लामो समयदेखि विवाद भएको र आफुले नसकेपछि न्यायिक समितिमा पठाएको उल्लेख गरे । उनले सोही स्थान पुगेर त्यहाँका भद्रहरूसँग बुझेरै सर्जमिन गरिएको तर अधिकारीले खरिद गरेको जग्गा भने नम्बरी नै रहेको बताए ।
यता न्यायिक समितिकी संयोजक तथा उपमेयर संगिता कुमारी चौधरीसँग बुज्दा उनले वडा कार्यालयबाट प्राप्त सर्जमिन र नेपालको कानुन अनुसार अधिकारीले खरिद गरेको जग्गा परापूर्व कालदेखि नै पानी जम्ने, खाली जमिन रहेको पाइएकोले पैनीको जग्गा छुट्टाएर भोगचलन गर्नपाउने गरी निर्णय गरेको बताइन् । उनले फैशला चित्त नबुझे अदालत जान सुझाव समेत दिइसकेको उल्लेख गरिन् ।
यता उपमेयरको फैसललाई लिएर न्यायिक समितिभित्रै विवाद मच्चिएको छ । समितिका सदस्य एवम उपमहानगर प्रवक्ता दिवश पोख्रेलले फैसलाविरूद्ध नोट अफ डिसेन्ट गरेका छन् । उनले पटक–पटक अमिन लगेर नाप जाँच गर्दा कुनै नाला तथा पैनी नभेटिएको, जग्गाको नक्सामा समेत कुनै नाला, पैनी नदेखिएको हुँदा उपमेयर चौधरीको फैसलाविरूद्ध नोट अफ डिसेन्ट दिएको बताए ।
