जुम्ला : जुम्ला प्रहरीले लिने निवेदन तथा जाहेरी दरखास्तको ढाँचा सार्वजनिक गरेको छ । प्रहरी नायब उपरीक्षक छेदीलाल कामतीले जिल्ला प्रहरी कार्यालयमा सेवा लिन आउने पीडित व्यक्तिहरूको सेवा सहजता ल्याउनका लागि निवेदन र जाहेरी दरखास्तको ढाँचा सार्वजनिक गरेका हुन् ।
उनका अनुसार यसअघि प्रहरीमा आउने सेवा ग्राहीले लेखन दासहरुसँग शुल्क तिरेर निवेदन लेख्नुपर्ने बाध्यता थियो । प्रहरी नायव उपरीक्षक कामतीका अनुसार निवेदन लेख्नका लागि कुनै शुल्क तिर्नुपर्ने अवस्था हुँदैन । यस कार्यले स्थानीय समुदायमा सकारात्मक प्रतिक्रिया ल्याएको छ, जसले गर्दा पीडित व्यक्तिहरूलाई प्रहरीबाट दिइने न्याय प्राप्त गर्न छिटो सजिलो हुनेछ ।
यसअघि प्रहरीले लिने निवेदन तथा जाहेरीको ढाँचा हुँदा कानुन व्यवसायीसँग लेखाउनुपर्ने बाध्यता थियो । जहाँ साक्षरता र कानुनी प्रक्रियाबारे जानकारीको अभावले गर्दा धेरैजसोले निवेदन लेखाउन अरूको सहायता लिँदा पैसा खर्च गर्नु परिरहेको थियो ।
यस समस्यालाई मध्येनजर गर्दै सेवाग्राहीका लागि जुम्ला प्रहरीले सबै प्रहरी चौकी तथा युनिटहरुमा प्रहरीले आफ्नै ढाँचामा तयार पारिएको निवेदनको फर्मेट र नमुना उपलब्ध गराउने भएको छ । शनिबार जिल्ला प्रहरी कार्यालय जुम्लाले पत्रकार भेटघाटमार्फत सार्वजनिक गरेको ढाँचामा सेवाग्राहीको पहुँच हुने र सबैले एउटै ढाँचामा निवेदन लेख्न सक्ने छन् भने यसले गर्दा निवेदन लेख्न अरूलाई पैसा तिर्न नपर्ने र दोस्रो व्यक्तिको सहयोग बिना सेवा पाउनेछन् ।
त्यस्तै डीएसपी कामतीले जाहेरी दरखास्तको ढाँचा सार्वजनिक गर्ने काम जनमैत्री प्रहरी प्रशासनतर्फको राम्रो महत्वपूर्ण रहेको बताए । यसले विशेषगरी ग्रामीण क्षेत्रका पीडितहरूलाई जाहेरी दिन सजिलो बनाउने उनको भनाइ छ ।
प्रहरीले आफुले सार्वजनिक गरेको निवेदन तथा जाहेरी दरखास्ताको ढाँचाले प्रहरीले दिने सेवाको प्रक्रिया पारदर्शी बन्ने र पीडितले आफूले भोगेको पीडा स्पष्ट रूपमा लेख्न सक्ने दाबी गरे ।
