काम चलाउ सरकारका प्रधानमन्त्री केपी शर्मा ओलीले प्रतिनिधिसभा विघटन गरे पछिको एक महिना संवैधानिक र राजनैतिक अन्योलमा बित्यो । ६४ प्रतिशत सांसदहरुको सर्वसहमत प्रधानमन्त्रीले संसद् विघटन गर्न पाउने ओलीको अभिव्यक्ति र संसद्मै नभएको धारा प्रयोग गरेर विघटन गर्नु असंवैधानिक भएको तर्क सुनेरै महिना बित्यो । संसद् विघटनको मुद्दा अहिले सर्वोच्च अदालतमा विचाराधीन अवस्थामा छन् । अदालतमा सुनुवाइ जारी छ । प्रधानन्यायाधीश सहित पाँच न्यायाधीश रहेको संवैधानिक इजलासमा बहस लगातार चलिरहेको छ । यो सँगै, प्रदेश तहको अन्योलता पनि गहिरिएर गएको छ । संसद् विघटन लगत्तै नेकपाको पुष्पकमल दाहाल प्रचण्ड र माधवकुमार नेपाल समूहले प्रदेश १ र बागमतीका मुख्यमन्त्री विरुद्ध अविश्वासको प्रस्ताव पेश गरेका छन् ।
ओली समूहका अन्य मुख्यमन्त्रीहरु हटाउने चलखेल पनि भइरहेको छ । विशेषगरी अविश्वासको प्रस्ताव दर्ता भएपछि प्रदेश १ का मुख्यमन्त्री शेरधन राई र बागमतीका मुख्यमन्त्री डोरमणि पौडेलको पद संकटमा परेको छ । यो संकट रोक्न ओली समूहले अनेक प्रयास गरिरहेका छन् । प्रचण्ड र माधव समूहका सांसदहरू प्रभावित बनाउने प्रयास रोकिएको छैन । अर्कातिर, प्रचण्ड र माधव समूहले पनि अविश्वासको प्रस्तावका पक्षमा सांसदहरु तान्ने प्रयास गरिरहेकै छ । यस्तोमा तानातानमा विभाजित नेकपाका मात्रै नभएर विपक्षी दलहरु पनि परेका छन् । यस्तो चलखेल मुलतः प्रदेश १ र बागमतीमै बढी छ ।
६७ मध्ये नेकपाकै ३७ सांसदले मुख्यमन्त्री राई विरुद्ध अविश्वासको प्रस्ताव दर्ता गराएका छन् । जबकी ९३ सदस्यीय प्रदेशसभामा सरकार बनाउन ४८ जना चाहिन्छ । अतः ४८ बनाउन विभाजित नेकपाका सांसदहरुलाई आकर्षक प्रस्ताव आउने गरेका छन् । बागमती प्रदेशको अवस्था पनि प्रदेश १ कै जस्तो छ । ८० जना सांसद रहेको नेकपाका ४५ जनाले मुख्यमन्त्री पौडेल विरुद्ध अविश्वासको प्रस्ताव पेश गरेका छन् । ११० सदस्य प्रदेशसभामा सरकार बनाउन ५६ सांसद आवश्यक हुन्छ ।
अर्थात्, नेकपा विभाजन भएपछि सांसदहरुको खरीद–बिक्री प्रकरण पुनरावृत्ति हुन पुगेको छ । २०५१ मा एमालेको अल्पमतको सरकार गिरेपछि पनि मुलुकमा सांसद नै खरीदबिक्री प्रकरण सतहमा आएको थियो । त्यसैलाई रोक्न २०७२ को संविधानले कडा प्रावधान राख्यो । तर, संविधानको प्रावधान बिपरीत अहिले जनप्रतिनिधिको खरीद–बिक्री हुने डिम्बना दोहोरिन पुगेको छ । जनताको आवाज उठाउनुपर्ने सांसदहरुमाथि आकर्षक प्रलोभनको वर्षा गरिएको छ । जनता र संवैधानिक भावनामाथि भने घात हुन पुगेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies