काठमाडौं : श्रम, रोजगार तथा सामाजिक सुरक्षा मन्त्रालयले वैदेशिक रोजगार व्यवसाय क्षेत्रमा रहेका समस्या समाधान गर्न गठन गरेको कार्यदलको पहिलो बैठक बुधबार बस्ने भएको छ ।
नेपाल वैदेशिक रोजगार व्यवसायी संघ, प्रगतिशील वैदेशिक रोजगार व्यवसायी मञ्च नेपाल तथा नेपाल लोकतान्त्रिक वैदेशिक रोजगार व्यवसायी एसोसिएसनले विगत ३÷४ वर्ष यता निरन्तर राखेका तर समाधान हुन नसकेका समस्या समाधानका लागि पटक–पटक मन्त्रालयमा ध्यानाकर्षण गराएपछि सचिव तोयम रायाले मन्त्रालयका रोजगार समन्वय महाशाखा प्रमुख सहसचिव हरिप्रसाद मैनालीको संयोजकत्वमा ९ सदस्यीय कार्यदल गठन गरेका छन् ।
उक्त कार्यदलमा मन्त्रालयका पाँच र व्यवसायीका तर्फबाट चारजना सदस्य रहेका छन् । मन्त्रालयको तर्फबाट सहसचिव मैनाली, कानूनका उपसचिव रेशराज आचार्यसहित रहेका छन् भने व्यवसायीका तर्फबाट संघका अध्यक्ष विष्णुप्रसाद गैरे, महासचिव सुजित कुमार श्रेष्ठ, मञ्चका अध्यक्ष राम प्रसाद भान्तना र एसोसिएसन अध्यक्ष नरेन्द्र प्रसाद ढकाल सदस्य रहेका छन् ।
सचिव रायाले वैदेशिक रोजगारका क्षेत्रका ऐन, कानून, कार्यविधि तथा निर्देशिकाहरुमा एकरुपता र एक आपसमा तादम्यता नमिलेको भन्दै कार्यदलले सकेसम्म विरोधाभास नहुने गरी कसरी एकरुपता ल्याउन सकिन्छ त्यस विषयमा गहिरो गरी अध्ययन गरी सुझाव पेश गर्न कार्यदललाई निर्देशन दिएको स्रोतले बतायो ।
व्यवसायीहरुले सरकारले सुरक्षित मर्यादित वैदेशिक रोजगार भन्ने गरे पनि व्यवसायलाई नियमन गर्ने वैदेशिक रोजगारका क्षेत्रका ऐन, कानून, कार्यविधि तथा निर्देशिकाहरु अव्यवहारिक र झन्झटिला, कतिपय अवस्थामा कर्मचारीमुखी रहेको भन्दै असन्तुष्टि जनाउँदै आएका छन् ।
मुख्यरुपमा म्यानपावर कम्पनी नवीकरण गर्न वार्षिक सय जना कामदार पठाउनुपर्नेदेखि सेवा शुल्क जस्ता विषय तत्काल समाधान हुनुपर्ने सबै व्यवसायीहरुको माग रहेको छ । तर यसअघि मन्त्रालयमा नेतृत्व गरेका सचिवहरुले समस्या समाधानमा मौखिकरुपमा सहमति जनाउने तर व्यवहारमा विपरीत व्यवहार गर्ने गरेको व्यवसायीहरुको गुनासो रहँदै आएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies