संसदीय व्यवस्था प्रति असहमति जनाउँदै एकीकृत क्रान्तिको कार्यक्रम लिएर सशस्त्र गतिविधि गरिरहेको नेत्रविक्रम चन्द विप्लव शान्तिपूर्ण राजनीतिका लागि तयार भएका छन् । सरकार र विप्लवका तर्फबाट वार्ता समिति बनेको तीन दिन विहानै तीन बुँदे सहमति भएको छ । सरकारले गृहमन्त्री रामबहादुर थापा बादल र प्रधानमन्त्रीका परराष्ट्र मामला सल्लाहकार राजन भट्टराई रहेको वार्ता समिति बनाएको थियो । विप्लवका तर्फबाट वार्तामा आएका खड्गप्रसाद विश्वकर्मा प्रकाण्ड र दीपक रहेको वार्ता समिति बनाएको थियो । दुवै तर्फका बार्ता समितिको बुधवार दुई चरणमा औपचारिक वार्ता भएको थियो । एकैदिन भएको वार्तामा सहमति जुटेपछि विहीवार तीन बुँदे सहमति भएको छ । सहमतिअनुसार, आज राष्ट्रियसभा गृहमा प्रधानमन्त्री केपी शर्मा ओली र चन्दले संयुक्त सम्बोधन गर्दै तीन बुँदे सहमतिमा हस्ताक्षर हुनेछ ।
दुई वर्ष अगाडि प्रतिबन्ध लगाएको समूहसँग सरकारले यसअघि थुप्रै पटक अनौपचारिक सम्वाद भएको थियो । पूर्वमाओवादी पृष्ठभूमिका नेता एवम् खानेपानी मन्त्री मणि थापाले नख्खु जेलमै पुगेर चन्द समूहका नेता हेमन्तप्रकाश वलीसँग कुराकानी गरेका थिए । यो भेटवार्ता पछि नै विप्लवसँग वार्ताको चर्चा बाहिर सार्वजनिक भयो । वार्ता समिति बन्नु अगाडि महासचिव चन्दले बक्तव्य सार्वजनिक गरी बार्ताका लागि सकारात्मक रहेको सन्देश दिएका थिए । यसपछि लगातार बार्ता प्रक्रिया अगाडि मात्रै बढेन, सहमति नै जुट्यो । तीन बुँदेबारे विस्तृत जानकारी दिइएको छैन, तर विप्लव शान्तिपूर्ण राजनीतिमा आउन तयार रहेको सरकारी अधिकारीहरुले जनाएका छन् । यो समूहले सशस्त्र आन्दोलन शुरु गरेपछि र सरकारले प्रतिबन्ध लगाए पछि एघार जनाको मृत्यु भइसकेको छ । प्रहरीसँग मुठभेड हुँदा केहीको र बम बिस्फोटबाट केहीको मृत्यु भएको थियो ।
तर, वार्ता पछि विप्लव शान्तिपूर्ण राजनीतिमा आएका छन् । संसदीय प्रणालीबारे कसरी अगाडि बढ्छन् भन्ने प्रष्ट भएको छैन । तर दुई वर्ष अगाडि पृथकतावादी अभियान चलाइरहेका सिके राउतसँग वार्ता गरेको सरकारले विप्लवलाई पनि शान्तिपूर्ण राजनीतिमा ल्याउने सार्थक पहल गरेको छ । यसले मुलुकमा शान्तिपूर्ण राजनीतिक बातावरण बन्ने आधार खडा भएको छ । भलै, घोषणा र सहमतिपत्रमा हस्ताक्षर हुन बाँकी छ । त्यो काम पनि आजै हुँदैछ । अतः शान्ति प्रक्रियामा आउने जुन सार्थक पहल भएको छ, त्यसलाई निष्कर्षमा पु¥याउँदा मुलुकका लागि महत्वपूर्ण उपलब्धी हुनेछ । दुवै समूहले देखाएको तदारुकता प्रशंसनीय छ । सम्वादकै माध्यमबाट समस्या समाधान तर्फ सरकारले आवश्यक लचकता देखाउनु आजको निर्विकल्प माध्यम हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies