नेकपा एमालेको अन्तर संघर्षका कारण राष्ट्रिय राजनीति प्रभावित हुँदै आएको छ । एमालेको नवौं महाधिवेशनबाट चर्किएको अन्तर संघर्षकै कारण साविकको नेपाल कम्युनिष्ट पार्टी (नेकपा) विभाजित भयो । त्यसबेलाको सत्तारुढ दल नेकपाको विवादका कारण मुलुकको ठूलो मूल्य चुकाउनु परेको छ । नेकपाका तत्कालीन अध्यक्ष एवम् निवर्तमान प्रधानमन्त्री केपी शर्मा ओलीले प्रतिनिधिसभा विघटन गरे । मुलुक कोरोना महामारीका कारण प्रताडित भइरहेका बेला ओलीको कदमले मानवीय भन्दा पनि संवैधानिक र राजनीतिक संकटतर्फ उन्मुख बन्यो । ५ पुसको असंंवैधानिक संसद् विघटनले गजल्टिएको संकट अझै हल हुन सकेको छैन । पहिले नेकपा र पछि एमालेको विवाद कायम रहँदा पाँच वर्षे सरकारको नेतृत्व गरेका ओलीको बहिगर्मन भइ नेपाली काँग्रेसका सभापति शेरबहादुर देउवा प्रधानमन्त्री बनेका छन् ।
नेपाली काँग्रेस, नेकपा माओवादी केन्द्र, जनता समाजवादी पार्टी (जसपा), नेकपा एमालेका बरिष्ठ नेता माधवकुमार नेपाल समूह र राष्ट्रिय जनमोर्चाको समर्थनमा देउवा प्रधानमन्त्री बनेपनि मन्त्रिपरिषद्ले पूर्णता पाउन सकेको छैन । एमालेकै विवादका कारण मन्त्रिपरिषद्ले पूर्णता पाउन सकेको छैन । आइतबार मात्रै प्रधानमन्त्री देउवाले स्वास्थ्य राज्यमन्त्री नियुक्त गरेका छन् । यो सहित ६ सदस्यीय मन्त्रिपरिषद्ले काम गरिरहेको छ । तर एमाले प्रतिपक्षमा भएपनि राष्ट्रिय राजनीतिको केन्द्रमा अझै उक्त दल छ । अहिले ओली र नेपाल समूह बीच मूठभेडकै खतरा देखिएको छ । अध्यक्ष ओलीले सैन्य संरचनाको युथ फोर्स ब्युताएका छन् । यो फोर्स बरिष्ठ नेता नेपाल समूह विरुद्ध लड्नका निम्ति बनेको छ ।
अर्कातिर नेपाल समूहले पनि पिपुल्स भोलियन्टर्स र अखिल फोर्स गठन गरेका छन् । यी सवै सैन्य संरचनाका दस्ता हुन् । युथ फोर्स युवा संघसँग आवद्ध, अखिल फोर्स अनेरास्ववियु र पीभी पार्टी सम्बद्ध फोर्स हुन् । यसलाई स्वयम् सेवी संगठन भनेपनि मुलतः यसको प्रकृति राजनीतिक फोर्स हो । ओली र नेपाल एकअर्का विरुद्ध निषेध गरिरहेका बेला यी फोर्सहरु बन्नुको अर्थ एमालेभित्र विधि र प्रणालीका आधारमा नभएर बाहुबललाई बढी विश्वास गरिएको बुझ्न सकिन्छ । अर्थात् संसद् विघटन, जनादेश बिपरीत सरकार परिवर्तन हुँदै युवा दस्ता निर्माणले मुलुकको राजनीतिक कोर्स सही दिशामा नरहेको पुष्टि हुन्छ । जसलाई नरोक्ने हो भने कानूनी शासन कमजोर भएर जाने खतरा बढी देखिन्छ । अतः यसबारे नेतृत्वले सोच्न ढिलाइ गर्न हुन्न ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies