सप्तरी । संघीय लोकतान्त्रिक मोर्चा आबद्ध मधेसवादी दलहरूले संयुक्त जनजागरण अभियान सुरु गरेका छन् । मोर्चाले बुधवार राजविराजमा ‘वर्तमान राजनीतिक अवस्थाको सन्दर्भमा जनजागरण अभियान’ कार्यक्रम शुभारम्भ गरेको हो ।

कार्यक्रमका वक्ता नेताहरूले मधेशका राजनीतिक, आर्थिक र सामाजिक मुद्दामा मिलेर जाने उद्घोष गरेका छन् । जनता समाजवादी पार्टी (जसपा) नेपालका अध्यक्ष उपेन्द्र यादवले पृथ्वीनारायण शाहदेखिकै शासकहरूले तराई-मधेसमा ‘औपनिवेशीकरण’ गरेको भन्दै आलोचना गरे ।

उनले राणाको समयमा मधेसका उब्जाउ जमिन राणा परिवारमा बाँड्ने काम  र त्यसलाई पञ्चायत हुँदै हालको भूमि विधेयकसम्म आइपुग्दा निरन्तरता दिन खोजिएको आरोप लगाए । “राणाकालमा बक्सिकको नाममा यहाँको उर्वर भूमि आफ्ना मान्छेलाई बाँडियो । पञ्चायतमा पनि भूमिसुधार र हदबन्दीका नाममा बाँकी रहेका जग्गा हड्पने र पहाडका मान्छेलाई बसाउने काम भयो । पुनर्वास र बसोबास कम्पनीका नाममा पहाडी शासकले मधेस उब्जाउ जग्गा हडपियो । हालको विधेयकले पनि त्यस्तै समस्या निम्त्याउने हाम्रो बुझाइ छ”, अध्यक्ष यादवले भने ।

अध्यक्ष यादवले संघीयता समावेशिता, संघीय गणतन्त्र र लोकतन्त्र मधेसी जनताको पक्षमा नदेखिएको भन्दै पहिचानका अधारमा पुनः संरचना गरिनुपर्ने जिकिर गरे ।

लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले एक हिसाबले गौर घटनाको राजनीतिक समाधान भइसकेको अवस्थामा बदनियतपूर्ण ढंगले मधेसी नेतामाथि आक्रमणको प्रयास भइरहेको बताए । राष्ट्रिय मुक्ति पार्टीका अध्यक्ष राजेन्द्र महतोले विगतमा पनि मधेसी जनताले विभिन्न चरणको आन्दोलन गरेको स्मरण गर्दै फेरि सबै मिलेर आन्दोलन गर्नुपर्ने अवस्था आएको धारणा राखे ।

कार्यक्रममा जनता प्रगतिशील पार्टीका अध्यक्ष हृदयेश त्रिपाठी, तमलोपा अध्यक्ष वृषेशचन्द्र लाललगायत नेताहरूले सम्बोधन गरेका थिए भने राष्ट्रिय मुक्त पार्टीका जिल्ला अध्यक्ष दीपेन्द्र चौधरीको अध्यक्षतामा कार्यक्रम सम्पन्न भएको थियो ।