काठमाडौं : सूर्य नेपाल प्रालिले ट्रंक लाइन उपयोगबापतको नेपाल विद्युत् प्राधिरकरणलाई बुझाउनुपर्ने बक्यौता बुझाइसकेको जनाएको छ । 

विगतमा लोडसेडिङको अवधिमा ट्रंक लाइनमार्फत बिजुलीको प्रयोगका लागि तिर्नुपर्ने अतिरिक्त महसुलसम्बन्धी सामाजिक सञ्जालमा प्रसारित सामग्रीप्रति ध्यानाकर्षण भएको भन्दै कम्पनीले प्राधिकरणको निर्देशनअनुसार सबै बक्यौता पहिले नै भुक्तानी गरेको विज्ञप्तिमार्फत जनाएको हो ।

सूर्य नेपालले कम्पनीले तिर्नुपर्नेभन्दा बढी रकम भुक्तानी गरेको समेत विज्ञप्तिमा उल्लेख गरेको छ । साथै, सूर्य नेपाल, सबै प्रचलित कानुन, नियम र नेपाल सरकार र सम्बद्ध निकायका निर्देशनहरूको पालना गर्न कम्पनी पूर्ण रूपमा प्रतिबद्ध रहेको विज्ञप्तिमा उल्लेख छ । 

सूर्य नेपालले भनेको छ, ‘कम्पनीले उल्लेखित विषयमा नेपाल विद्युत् प्राधिकरणको निर्देशनअनुसार पहिले नै सम्बन्धित बक्यौता तिरेको हुनाले, भ्रामक जानकारी प्रसारित नगर्न हामी सबैलाई विनम्र अनुरोध गर्दछौं ।’