चलचित्र ‘लुट कम्पनी’बाट आफ्नो अभिनय यात्रा शुरु गरेका हालका ब्यस्त अभिनेता संजोग राणा अभिनित ‘धुम ४’ दिपावलीको अवसर पारेर प्रदर्शनमा आएको थियो । रेलिमाई, नदेखिएको जात, ढुंगेयुग, लुट कम्पनी, छल, धुम २, धुम ४, हिरोज, मधुमाला लगायताका चलचित्रमा अभिनय गरिसकेका अभिनेता राणाले बंगाली चलचित्रमा समेत काम गरेका छन् । निर्माणाधीन केही चलचित्रमा अनुबन्धित अभिनेता संजोग राणा धादिङ धुनिवेशीका स्थानीय बासिन्दा हुन् । अभिनय र निर्माणमा समेत संलग्न राणा कोरोना कहरका कारण सिनेमा क्षेत्र नराम्ररी प्रभावित बनेकोमा चिन्तित छन् । कोरोना कहरले सिनेमा क्षेत्रमा पारेको असर र भावि दिनमा सिनेकर्मीहरुले अपनाउनु पर्ने विषयमा आधारित रहेर अहिलेका ब्यस्त अभिनेता संजोग राणाले मध्यान्ह दैनिकका लागि सानु श्रेष्ठसँग गरेको कुराकानीको सम्पादित अंशः
यतिबेला कसरी दिनचर्या बित्दैछ ?
पर्वको अवसर पारेर तिहारको समयमा ‘धुम ४’ प्रदर्शनमा आएको कारण त्यसको प्रमोशनमा लागियो र भर्खरै एउटा नयाँ चलचित्रमा अनुबन्ध भएकोले त्यसको होमवर्कमा पनि समय दिनु परेको छ ।
कोभिडबाट डराइरहेका दर्शक हलमा सिनेमा हेर्न जालान् त ?
सरकारले निषेधाज्ञा खुकुलो बनाएको छ । हल पनि खुलेको कारण र धेरै समय घरमै पट्यारलाग्दो गरी थुनिएर बस्नु परेको बाध्यात्मक परिस्थितिको अन्त्य भएसँगै नेपाली चलचित्रका दर्शकहरु सिनेमा हेर्न हलमा आउनु हुनेछ भन्ने विश्वास छ ।
कोभिडले थलापरेको सिनेमा क्षेत्रलार्ई उठाउन के गर्नु पर्ला ?
यो महामारीबाट थलापरेको सिनेमा क्षेत्रलाई गतिशील बनाउन चलचित्र क्षेत्रसँग सम्बद्ध सबै पक्ष मिलेर जानुको विकल्प छैन । कोरोना कहरका कारण दर्शक हलसम्म पुग्न अझै डराइरहेका छन् । कोरोना महामारीका कारण बन्द भएका सिनेमा हल बिस्तारै खुल्ने क्रम शुरु भएको छ । बिस्तारै सुधार हुने आशा गर्न सकिन्छ । सिनेमा क्षेत्रलाई गतिशील बनाउन चलचित्र उद्योगी र राज्य दुबै गम्भीर बन्नुपर्छ ।
सहजरुपमा हल संचालन गर्न के गर्नुपर्ला ?
महामारीले गर्दा लामो समय हल बन्द हुँदा त्यसमा आश्रित श्रमिकलाई पारिश्रमिक दिन समस्या परेको होला । अहिले हल संचालनका लागि हलवालाहरु तयार भएपनि राम्रा सिनेमा पाउन सकिरहेका छैनन् । दशैंमा दुई वटा नयाँ सिनेमा प्रदर्शनमा आएका थिए र अहिले पनि फ्रेश सिनेमा प्रदर्शन भैरहेको अवस्था छ । कोरोना कहरकै कारण सिनेमा रिलिज गर्न निर्माताहरु डराइरहेका भएपनि केहीले त हिम्मत गरेर आफ्ना सिनेमा हलमा गलाएका छन् । यो समयमा दर्शकलाई कसरी हलसम्म ल्याउने भन्ने वातावरण निर्माण गर्नु आवश्यक छ ।
तपाईं कलाकारितासँगै निर्माण पनि बुझेको ब्यक्ति, यस्तो अवस्थामा सिनेमा चलाउन उपयुक्त होला त ?
कुनै पनि व्यवसायमा लगानीकर्ताले मुनाफा खोज्नु स्वभाविक हो । यो व्यवसायमा पनि कम्तिमा लगानी फर्किनुपर्ने आशा राख्नु लगानीकर्ताको धर्म हो । कोरोना महामारीका कारण सिनेमा क्षेत्र धरासायी बन्दै गएकोले राज्यले पनि सिनेमा निर्माणमा सकेको अनुदान दिनुपर्ने हो । तर अहिलेसम्म राज्यले यो क्षेत्रलाई हेरेको अवस्था छैन । ठुलो जनशक्तिलाई रोजगार दिने र राज्यलाई पनि कर तिर्ने क्षेत्र भएकोले जो लगानी गर्ने ब्यक्ति वा समूहलाई मात्र आर्थिक भार नपर्ने गरी सिनेमा निर्माणको लागि वातावरण बनेको खण्डमा जस्तो सुकै अवस्थामा पनि सिनेमा चलाउन सकिन्छ ।
आफ्नो पहिचान बनाउन सफल सिनेमा कुन हो ?
मेरो पहिलो चलचित्र ‘लुट कम्पनी’ले उद्योगमा स्थापित गरायो । र, चर्चा पनि गराएको हिसावले ‘लुट कम्पनी’ ले नै आमरुपमा चिनाएको ठान्दछु । ‘धुम २’ र ‘रेलिमाई’ पनि मेरा हिट चलचित्र मध्येका हुन् ।
सिनेमा जगतमा तपाईंको उचाई ?
उचाईमा पुर्याउने भनेको दर्शकको मायाले हो । मेरो कलाकारिता जीवनमा कहिले पनि आफ्नो व्यक्तिगत तारिफ गरिनँ । तपाईंहरूलाई थाहा छ म मेरो व्यक्तिगत चर्चा परिचर्चाको विषयमा कहिल्यै अगाडि आइनँ । धेरै मिडियाले पच्छाउँदा पनि म यदाकदाबाहेक पछि नै बसें । त्यसैले मेरो बारेमा बजारमा के कस्ता चर्चा परिचर्चा हुन्छ त्यता ध्यान दिन चाहिनँ, चाहें त केवल आफुले एक पछि अर्काे काम कसरी राम्रो दिन सकिन्छ भन्ने । धेरैभन्दा पनि राम्रा, संख्याको हिसाबले भन्दा पनि गुणात्मक सिनेमालाई मेरो जीवनसँग जोड्दै आएको छु । त्यसैले दर्शकहरूले मेरो अभिनय रहेको सिनेमालाई पर्खिएर बसेको पाएको छु । यसले गर्दा पनि मेरो व्यक्तिगत चर्चा र महत्व दर्शकबाट कम हुन्छ जस्तो लाग्दैन । सम्भवतः यही नै उचाई होला ।
आगामी योजना के छ ?
एउटा कलाकारको भावी योजना भनेको दर्शक माझ उहाँहरुको रुचीमुताविक सिनेमा दिन सक्दो प्रयास गर्ने हो । राम्रो टिमसँगको सहकार्यमा उत्कृष्ट सिनेमा निर्माण, प्रदर्शन र व्यावसायिकरुपले पनि सफल गराउन आफ्नो तर्फबाट लागि पर्ने हो । राम्रो विषयवस्तुको छनोटसँगै त्यसको गृहकार्यमा समेत हामी जुटिसकेको अवस्था भएकाले आगामी दिनमा राम्रा सिनेमा दर्शकमाझ पस्कदै जानेछु भन्ने विश्वास दिलाउन चाहन्छु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies