युएई : संयुक्त अरब इमिरेट्स (युएई) को अबुधाबीस्थित सलाम सिटीमा एक नेपाली युवक मृत अवस्थामा फेला परेका छन् । संखुवासभाको मादी नगरपालिका–८ निवासी पासपोर्ट नम्बर ११८५१२६३ भएका २९ वर्षीय जितबहादुर लिम्बू गत आइतबार आफ्नै कोठाभित्र झुन्डिएको अवस्थामा मृत फेला परेका हुन् ।

जितबहादुरलाई कोठामा साथीहरूले डोरीको पासो लगाएर झुन्डिएको अवस्थामा भेटेका थिए । उनी पछिल्ला दुई–तीन दिनदेखि काममा नगएको र कोठामै एक्लै बस्दै आएको बताइएको छ । लामो समयसम्म सम्पर्क नहुँदा शंका लागेपछि साथीहरूले कोठा खोलेर हेर्दा उक्त अवस्था देखेपछि तत्काल सम्बन्धित निकायलाई जानकारी गराएका थिए ।

उनका साथीहरूका अनुसार जितबहादुर धेरै बोलचाल नगर्ने, शान्त स्वभावका व्यक्ति थिए । उनी विगत करिब तीन वर्षदेखि अबुधाबीस्थित एक निजी कम्पनीमा साधारण कामदारको रूपमा कार्यरत थिए ।

अबुधाबी प्रहरीले घटनाबारे अनुसन्धान सुरु गरिसकेको छ । प्रहरीका अनुसार प्रारम्भिक रूपमा पारिवारिक समस्याका कारण आत्महत्या गरेको हुनसक्ने अनुमान गरिएको छ । यद्यपि, घटनाको यकिन विवरण पोस्टमार्टम रिपोर्टपछि मात्र थाहा हुने प्रहरीको भनाइ छ ।

हाल जितबहादुरको शव अबुधाबीको एक अस्पतालमा पोस्टमार्टमका लागि राखिएको छ। कम्पनी स्रोतका अनुसार अस्पतालको औपचारिक रिपोर्ट प्राप्त भएपछि नेपालस्थित परिवार तथा युएईस्थित नेपाली दूतावासलाई जानकारी गराई शव नेपाल पठाउने प्रक्रिया अघि बढाइने छ ।

मृतक जितबहादुरका तीन दाजुभाइ र एक बहिनी रहेका छन् । उनकी आमाको केही समयअघि निधन भइसकेको र परिवारसँग सम्बन्ध पनि खासै राम्रो नरहेको उनका साथीहरूले बताएका छन् । उनी करिब तीन वर्षअघि रोजगारीका लागि अबुधाबी आएका थिए ।

कम्पनीमा कार्यरत एक नेपाली कर्मचारीका अनुसार आवश्यक कागजी प्रक्रिया पूरा गरी युएईस्थित नेपाली दूतावाससँग समन्वय गरेर शव छिट्टै नेपाल पठाउने तयारी भइरहेको छ ।

विदेशमा कार्यरत नेपाली कामदारहरू मानसिक तनाव, पारिवारिक समस्या तथा सामाजिक दबाबका कारण विभिन्न कठिनाइ झेल्न बाध्य हुँदै आएका छन् । पछिल्लो समय युएईसहित खाडी मुलुकमा नेपाली कामदारको आत्महत्याका घटना बढ्दै गएकाले मानसिक स्वास्थ्य सहयोग, पारिवारिक संवाद तथा दूतावासको सक्रिय भूमिका आवश्यक रहेको सरोकारवालाहरूले बताएका छन् ।